Piang ang kagamhanan

Misamot ka dako ang problema sa kagamhanan sa Pilipinas niining pag-ulbo sa engkwentro tali sa kasundalohan sa Malaysia ug mga sakop sa Royal Army sa Sultan sa Sulu didto sa Sabah. Daghan ang kinabuhi nga nakalas sa kagubot ug miangin na og liboan ka molupyo kinsa mikalagiw na sa ilang pinuy-anan.

 Apan dili unta kini mahitabo kun alisto pa ang gobiyerno sa Pilipinas pag-aksiyon alang sa malinawong solusyon sa maong problema. Klarong kulang sa pagtagad ang kagamhanan sa kawsa sa Sultan sa Sulu sa maong isyu. Mokabat sa 200 ka mga sakop sa Royal Army sa Sultan sa Sulu ang atoa karon nagkatag sa Sabah. Kini human sa wala’y puas nga airstrikes sa military sa Malaysia pagpalayas kanila gikan didto.

Sa ulahing balita daghan sa mga sundalo sa sultan ang namatay sa engkwentro uban sa militar sa Malaysia. Daghan usab ang nadakpan atol sa operasyon paggukod sa mga sundalo sa sultan.

Apan piang gayud ang kagamhanan sa Pilipinas niining maong sitwasyon. Bisan pa man sa paningkamot sa atong gobiyerno alang sa malinawong kasulbaran sa maong problema, wala kini paminawa sa kagamhanan sa Malaysia.

Mihimo gyud ang kasundalohan sa Malaysia og mga pagpangatake sa mga sundalo sa sultan. Gani mibahad gayud sila nga ila nga puohon ang maong mga armadong Pilipino nga midagsa sa Sabah.

Hinuon mas modako pa kining maong kaguliyang sa Sabah. Kini tungod kay aduna kunoy ubang mga armadong grupo gikan sa Sulu ang mo-reinforce sa mga sundalo sa sultan didto sa Sabah.

Sa akong nakita, hangtud nga dili masulbad ang problema sa ownership sa Sabah, padayon ang paghandum sa mga kaigsuonan natong Muslim sa Mindanao nga maangkon gayud ang maong lugar. Wala unta gipaabot sa gobiyerno sa Pilipinas nga mosangpot sa ingon niini nga sitwasyon ang gubot didto.

Daghan nang dugo ang mibanaw. Ug mapugnan lamang kini kun makumbinsi sa Pilipinas ang international community nga mopataliwala.