Langas nga pista

Si Attorney Antonio Oposa Jr., inilang environmentalist,  gikataho nga misang-at og kaso batok sa mga tigpasiugda og mga kapistahan didto sa lungsod sa Sta. Fe, Bantayan tungod sa kasaba niini.

* * *

Ang kasaba gimugna sa mga tawo nga miabusar sa paggamit sa sound system kon loudspeaker. Ang reklamo ni Sir Oposo adto niya gisang-at sa Office of the Provincial Prosecutor. Ug daghang mga biktima usab sa kasaba sa sound system atol sa pista sa ubang dapit ang mihangup sa gihimo ni Sir Oposa.

* * *

Dili lang didto sa Sta. Fe masinati ang kasaba o kalangas atol sa kasaulogan sa mga patronal fiesta. Anaa ang kasaba sa tanang kapistahan, labi na atol sa sayaw-sayaw kun baylebayle o diskoral.

* * *

Daghan ang nanghinaut nga ang gihimo ni Sir Oposa ilhon nga wake-up call alang sa mga organizer kon tigpasiugda og kapistahan sa mga kabarangayan ug kalungsuran dili lang didto sa Bantayan Island kundili sa uban sad mga dapit diin ang susamang problema nagpadayon.

* * *

Dinhi pananglitan sa siyudad sa Sugbo pirmeng dunay mga ginagmay’ng kapistahan. Oo ginagmay apan grabe ang kasaba sa mga tawong nagsaulog sa maong kapistahan. Mga estudyante dili makatarong og tuon sa ilang leksyon tungod sa kasaba.

* * *

Magpasalamat kita kang Attorney Antonio Oposa Jr. gumikan sa iyang pagreklamo batok sa kasaba sa kapistahan diin dugay nang panahon nga giantos sa mga katawhan.

* * *

TRIVIA. Maayong buntag sa atong mga higalang magbabasa diha sa Martires St. ug mga dapit libot niini. Daghang salamat sa inyong nagpadayong suporta sa Banat News.