Nasulod sa bulsa sa Malaysia si PNoy?

Gibasol ni Pangulong Noynoy Aquino ang kanhi administrasyon nga maoy responsable sa pagpagrabe sa suliran nga gimugna sa Sultanate of Sulu. Ang administrasyon ni Aquino mipasangil sa kanhi administrasyon nga maoy nagpaluyo ug nagpundo sa mga sundawo sa Sultanate of Sulu nga atoa karon didto sa Sabah Malaysia.

Ang administrasyon ni Pangulong Noynoy Aquino murag naanad na sa pagpamasa ngadto sa uban sa mga palpak niining hukom. Kun nakahinumdom pa mo, sa dihang napalpak ang administrasyong Aquino sa paghupot sa hostage crisis sa Luneta diin walo ka mga turistang taga Hong Kong ang namatay gibasol sa presidente ang kanhi administrasyon. Karon nga krisis didto sa Sabah ang kanhi administrasyon na usab ang iyang gipasanginlan. Kining tanan atong masumada pinaagi sa pag-ingon nga kun kapalpakan iya na sa kanhing administrasyon pero kun mga kalampusan iya na sa administrasyong Noynoy Aquino. Ang galing no?

Sa mga krisis nga iyang nasugatan nakita nato nga dili preparado ang administrasyong Aquino. Gani sa miaging mga adlaw naglibog pa ang administrasyong Aquino kun unsa ang sulusyon nga himoon sa suliran sama na lang sa pamahayag ni Pangulong Noynoy Aquino, justice secretary Laila Delima ug interior secretary Mar Roxas.

Samtang ang pangulo gustong papaulion sa nasud ang mga sakop ni Sultan Kiram ug gani nagpadala pa siya og barkong masakyan sa ilang pagpauli, gihulga usab ni Delima ang mga sakop ni Kiram nga pasakaan og kaso sa ilang pagpauli sa nasud ug gitawag ni Mar Roxas nga mga gahi og ulo ang mga sakop ni Kiram.

Kun ikaw sakop ni Kiram nga giawhag ni Pangulong Aquino sa pagpauli sa nasud, mopauli kaha ka kun sa imong pagpauli nagpaabot ang kasong ipasaka nimo? Kun ikaw sakop ni Kiram nga daan nang nangluod sa administrasyong Aquino tungod sa pag abandonar kanila dili kaha ka magmagahi sa imong ulo kun ginganlan kanang gahi og ulo?

Kun sa sinugdanan pa lang gipakita na sa pangulo ngadto sa mga sakop ni Kiram ug sa kinatibuk-ang sultanato nga nagpakabana ang iyang administrasyon sa ilang suliran dili seguro mosangpot sa ingon niini karon ang kahimtang sa suliran. Pero ina kay sabton ug magpakabana sa suliran sa Sultanato giabandonar hinoon niya kini.

Kun gipakita pa unta sa Aquino administrasyon ngadto sa Sultanate of Sulu ang iyang pagpakabana ug pagsabot sa ilang suliran dungan ang pagpakigsabot-sabot ngadto sa gobyerno sa Malaysia mahitungod sa nahisgotan nang suliran dili seguro bation sa sultanato sa Sulo nga sila giabandonar. Ako dako og pagtoo nga makig estorya ang gobyerno sa Malaysia sa administrasyong Aquino tungod kay sayod sila nga ang gihimo sa sultanato sa Sulu dili sanction sa gobyerno sa Pilipinas.

Bisan tuod og nakig estorya na ang gobyerno ni Pangulong Noynoy Aquino sa gobyerno sa Malaysia pero may dugo nang mibanaw ug kinabuhing nakalas. Hinoon dili pa ulahi ang tanan. Ang gobyerno ni pangulong Aquino aduna pay mahimo aron mabawi ang nahimo niyang sayop.   

Labing seguro ang pag-abandonar sa administrasyong Aquino sa Sultanate of Sulu may relasyon kini sa dakong tampo o tabang sa Malaysia sa nakab-ot nga kasabotan sa gobyerno sa Pilipinas ug mga sakop sa Moro Islamic Liberation Front. Ang administrasyong Aquino nahadlok nga mangluod sa Pilipinas ang Malaysia maong iyang gipalabi ug gipaboran ang Malaysia kay sa iya mismong katawhan nga sakop usab sa sultanato sa Sulu. Pero dilin ba diay mapabilin sa kasamtangang administrasyon ang pag-ila sa natampo sa Malaysia sa nakab-ot nga kasabotan tali sa iyang gobyerno ug sa mga sakop sa Moro Islamic Liberation Front sa walay pagkompromiso sa claim sa sultanato sa Sulu sa Sabah?

Dinhi makapangutana ta, wala kaha masulod sa bulsa sa Malaysia ang kagamhanang Aquino? Ang pagtabang sa Malaysia sa kagamhanang Aquino dili kaha kadto paagi aron dili ta makareklamo ngadto kanila sa ilang himoon sa Sabah?