Kanunay kita makabasa’g balita bahin sa mga polis badlongon. Polis nga mangotong o mangilkil, polis mangawat, polis manglugos, etc. Tagsa ra, if ever, ang balita bahin sa maayong buhat sa polis.
* * *
Aniay balita bahin sa tulo ka polis nga dalaygon ang gibuhat. Sila si Junjun, Greg ug Sandy. Pulos sila mga police officer 2 kon PO2. Wa ta lang hisguti ang kompletong mga ngan kay basig makalapas kita’g lagda.
* * *
Si Junjun di pa dugay gipahalipayan sa usa ka langyaw didto sa Manila human kini miluwas sa aksidente sa anak niini nga special child.
* * *
Si Greg gihatagan unta og pahalipay nga cash tungod sa iyang pag-uli sa tag-iya sa usa ka bandol nga papel de bangko. Apan nibalibad siya sa reward kay kuno obligasyon ni bisan kinsa ang pag-uli sa tag-iya sa butang dili iya.
* * *
Si Sandy migukod og usa ka isnatser nga milabni sa shoulder bag sa usa ka estudyante kang kansang amahan usa ka opisyal sa Army.
* * *
Kining tulo ka polis sakop sa nagkalahing police station sa Metro Manila. Pulos sila mibalibad sa pagdawat sa ganti kon pahalipay nga gitanyag kanila.
* * *
Trivia. Daghang salamat ngadto ni Mrs. Chita Amable nga taga Maasin City sa iyang suwat pahalipay sa Banat News sa anniversary niini. Ang suwat gipada sa usa ka taga-Cebu apan nadugay pag-abot dinhi kay nihapit pa ang bearer sa Manila. Salamat Mrs. Amable sa imong suporta sa Banat News.