Mangunguot mihasi

Kinsay nag-ingon nga luwas ka sa mga kawatan ug mangunguot kun anha ka mangompra sa mga department stores?

Kaniadto tingali, apan karon dili ka na luwas ilabi na sa mga department stores diha sa downtown area.

Tiaw mo, si City Health Officer Stella Ygoña namili lang tawon og bag diha sa dakung department store sa dalan Colon apan maghiling niya sa iyang bag wala na ang iyang Ipod.

Ang P35,000 nga Ipod nga nakuot gikan sa iyang bag kaniadtong Pebrero 21 isyu kadto sa City Hall. Sa lain usab nga department store nga susama ra og ngalan, kawani sa hukmanan ang nabiktima. Ang court employee nakuhaan sa iyang pitaka nga adunay sulod nga P3,000 ug mahinungdanong cards. Maayo na lang kay P3,000 ra man.

Ang akong misis kay nangompra usab sa maong department store niadtong Nobiyembre 16, dugay kaayo ko gitug-anan nga ang iyang P56,000 nga puhonan sa negosyo nakuot g’yud sa mga mangunguot.

Ang kapolisan dili makahimo sa pagbantay sulod sa department store aron siguroon ang kaluwasan sa mga customer, sa gawas hinoon sa tindahan mahimo sila nga magpwesto.

* * *

Atensyon Kernel Mariano Natuel, ang acting director sa Cebu City Police Office (CCPO). Paghimo ra gud kamo og pakisusi anang mga babaye nga naglinya diha kilid sa Metro Gaisano nga mga tigpangilis og Purchase Orders kon PO, nakaila sila sa mga mangunguot.

          Dihang nakighinabi ko sa maong mga PO changers, gitug-anan ko nila sa kabuang niining maong “sindikato” apan mahadlok lang sila. Makakita gud sila unsaon pagbiktima ang mga wala intawon magdahum nga mga tawo.

 Nasayud ko nga daghan kaayong mga nabiktima sa pagpanguot diha nga wala lang mo-report sa mga polis, usa na kanila ang akong misis.

Mao ra man gihapon kun mo-report wala may mahimo. Ako gani, gilungkab ang akong balay niadtong Enero 20 sa gabii, wala man moreport ang Theft and Robbery Section (TRS) kun unsa na ang kalamboan sa ilang imbistigasyon.

 Sa ato pa, ang pag-report nato sa mga hitabo diha sa kapolisan para lang diay sa “record purposes.”

 Kun wala’y mahimo ang kapolisan batok niining mga mangunguot nga anaa na sa sulod ug palibot sa mga department store, maayo pa tingali nga awhagon nato kadtong mga vigilantes nga mobalik sila pag-operate dinhi sa dakbayan.

Mao na diha, kun atong “inday-indayon” kining mga badlongon sa katilingban, mogara sila ug dili mahadlok. Kinahanglang silotan sila dayon.

Tan-awa ra gud didto sa Davao, magpanuko ang mga badlongon sa paghimo’g binuang kay sigurado sila nga matipi kun masakpan.