Gidid-an sa Commission on Election si Konsehal Jun Pe nga makapapili pag-usab pagka konsehal sa dakbayan sa Sugbo karong umaabot nga piniliay tungod kay kulang ang iyang residencia sa South nga bahin sa dakbayan.
Si Konsehal Jun Pe anaa na sa iyang kataposang termino sa pagka konsehal sa Norte nga bahin sa dakbayan busa sigon sa balaod dili na siya poyde nga makapapili pag-usab sa pagka konsehal sa norte nga distrito. Apan kay gusto pa nga moserbisyo sa katawhan sa iya pang pulong, ang konsehal magpapili pagka konsehal gihapon pero sa South na nga distrito ug dili sa Norte.
Tungod niini ang iyang mga kaatbang sa politika mipasaka og disqualification nga kaso batok kaniya gumikan sa rason nga kun tugotan pa kining makapapili molapas na sa tulo ka termino nga limitasyon ang konsehal kun ugaling siya modaog.
Sa miaging semana ang Commission on Election mipagawas og hukom nga nag-disqualify kang Jun Pe sa pagpapili pag-usab dili tungod sa tulo ka termino nga limitasyon kun dili tungod kay wala siya makaabot og usa ka tuig sa iyang pagpuyo sa South district diin siya magpapili pagka konsehal.
Sa iyang hukom ang Commission on Election miingon nga unsaon man kuno pagka molupyo sa konsehal sa South district kun siya lig-on sa iyang baruganan nga nagpuyo upod siya sa Norte nga distrito diin siya nag-alagad nga konsehal.
Si Konsehal Jun Pe ug ang kampo sa iyang mga kaatbang sa politika nagkauyon sa pagsupak sa gipagawas nga hukom sa Commission on Election. Pero bisan sa iyang pagsupak ang konsehal mipadayag gihapon sa iyang kalipay tungod kay sayon na lang kunong tubagon ang isyu sa iyang residency.
* * *
Kapin sa 200 ka mga tinun-an ug magtutudlo sa Quiot High School ang mitambong sa gipahigayong anti-drug seminar for students and teachers sa Quiot covered court kaniadtong Pebrero 17, 2013 adlaw nga Domingo. Ang anti-drug seminar gipasiugdahan sa ERPAT - Empowerment and Reaffirmation of Paternal Abilities Training sa Barangay Quiot ug NEWGAD, INC. - New Generation Against Drugs and Corruption, Inc.
Si Sr. Inspector Allan Palmero Cuizon ang deputy for operation sa Cebu Provincial Police Office ang mi-seminar sa mga tinun-an ug mga magtutudlo.
Ang seminar gitambongan usab sa mga barangay official sa Quiot pinangulohan ni Barangay Captain Jun Ramos, mga konsehal Nory Lawas ug Jojo Martinez ug GAD focal nga sila si Cely Torremocha, Agnes Soriano ug Ellen Dabon.
Ang ERPAT sa Barangay Quiot nagpasalamat nila Ahmed Erpe, deputy collector for operation sa Bureau of Customs sa Port of Cebu ug Carling Corsega, hepe sa assessment division sa mao gihapong buhatan, Barangay Captain Vicente B. Ramos Jr., mga konsehal Nory Lawas, Francis "Pangkoy" Espares, Alllan "Goliat" Nacorda sa ilang gihatag nga ayuda para sa kalamposan sa seminar.