Nganong gidili ang baboy sa Semana Santa

Usa sa kinalamiang sud-an nga kan-on mao ang baboy. Bisag unsaon ni sa pagluto: gikan sa humba ngadto sa litson, tagsa rang tawo nga dili motulo ang laway sa kaibog. Gani, bisag ang mga masakiton nga gidid-an, mohabhab gyod! Sa laktod, ang baboy maoy paboritong pagkaon halos sa tanang Romano Katoliko.

Ako lang kauban sa trabaho nga iyang misis litsong baboy ang negosyo, mohalin og ginatos ka buok kada adlaw. Kini sa iyang misis lang. Unya ning siyudad, pila ba ka mga komersiyante ang namaligya’g sama sa ilaha? Kini, nagpasabot lang nga ang baboy nahimong kinaham nga kan-onon sa  katawhan. Naartista pa ni, sikat kaayo. Pirmeng gidumog! Pirmeng giduom sa tilaokan! Bahala’g atakihon sa  hayblad, di nila igsapayan! Ingon ini kagahig ulo ang tawo. Bisag nasayod nga ang pagbuhat sa ingon, makadaot, buhaton gyod.

Hinungdan, nga si kinsa kadtong nagpabadlis sa Ash Wednesday, gibaoran sa simbahan nga dili pakan-o’g karne kada Biyernes sulod sa mga adlaw sa kuwaresma, agig puasa. Apan nganong baboy man ang gidili? Sa dinhi pa si Hesukristo sa kalibotan, samtang nanudlo Siya sa mga pulong sa Iyang Amahan sulod sa sinagoga (balay-alampoanan), may mga tawo, kinsa nasudlag yawa. Iyang gipagawas ang daotang espiritu sa mga nayawaang lawas ug gipalayas. Sa labihang kahadlok, nanagan ang mga demonyo palayo. Unya, human niadto may laing higayon nga naengkuwentro ni Hesus ang mga yawa. Puwerting kuyawa nila nga nakapangutana: “Unsay imong tuyo namo? Ania ka ba aron kami imong puohon?” Mihangyo sila ni Hesus nga sila pasudlon ngadto sa panon sa mga baboy nga diha sa ilang duol, diin gitugtan sila. Apan bisan usa walay naluwas kanila dihang nangambak ang tanang baboy niadtong ngitngit ug lawom nga pangpang sa kamatayon.

Segun sa pangagpas ning tagsulat, kini maoy hinungdan nganong gidili ang pagkaog baboy panahon sa Semana Santa. Dili kay hugaw lang ang baboy kay mukaon gud ni’g hugaw sa tawo. Hayop kini nga maoy gisudla’g daotang espiritu nga iyaha sa yawa. Busa, dili maayong kalan-on kay ang paghimo sa ingon, makadaot ug makamatay. Simbolo ang baboy sa kahugaw nga mopilit sa atong lawas ug sa sala nga mutapot sa atong kalag. Tapolan pa gyod. Sige lang lubog ug katulog. Mubangon lang aron mukaon. Kinaiya nga dili mosugot ang Ginoo nga maoy atong sundon.

Mao diay ... mao diay nga ang mga Muslim di gyod mukaog baboy.