Pildi gana
Ang Commission on Elections mihukom nga i-disqualify si konsehal Jun Pe pagsalmot sa eleksiyon karong Mayo isip kandidato pagkakonsehal sa South District tungod sa kapakyas niini pagtuman sa residency requirement.
Apan inay maguol, daw sa naibtan og tunok ang kampo ni Pe sa nahimong hukom sa Comelec. Kini tungod kay ang usa sa mga gibasihan sa disqualification case batok niya gibasura man sa komisyon.
Nigawas nga mas gipaburan sa Comelec ang argumento ni Pe maylabot sa term limit. Ubos man gud unta sa balaod gidid-an na pagpapili sa samang posisyon ang usa ka opisyal nga nakahuman na sa tulo ka sunod-sunod nga termino.
Apan si Pe bisan og mahuman na ang termino karong Hunyo 30 milansar gihapon pagkakonsehal apan didto na sa South District.
Iyang rason nga dili na sama nga distrito ang iyang serbisyohan busa dili mo-apply ang term limit niini.
Ang Comelec mikalawat sa argumento ni Pe. Mao nga bisan kun gi-disqualify tungod sa kakuwang sa residency requirement wala maguol ang kampo sa konsehal.
Kini tungod kay mas sayon alang nila lantugion ang isyu sa residency kay sa term limit. Si Pe tataw nga dunay pinuy-anan sa Banawa diha sa Guadalupe busa kun mangayo siya og reconsideration sa Comelec ug mohangyo nga mopahigayon og ocular inspection mas dako siya og kahigayonan nga makapadayon sa iyang kandidatura.
Ang abogado mismo ni Pe nga si Ralph Sevilla miangkon nga tungason alang nila ang isyu sa term limit.
Mao nga sa dihang migawas ang hukom sa Comelec bisan disqualification maoy desisyon apan nagsadya ang kampo ni Pe.
Mas naguol pa ang kampo sa Team Rama nga maoy kihante tungod sayod sila nga sayon ra mausab ang hukom kun ang lantugi masentro sa residency.
Kamatuoran niini ang kampo sa Team Rama buot sab nga mohangyo sa Comelec nga ilakip sa grounds sa disqualification ni Pe ang iyang paglapas sa term limit.
Kun mahitabo nga makapangayo si Pe og reconsideration ug katugotan siya nga makapadayon pagpapili atong masukod unsa ka intelihente ang mga botante sa South District.
Masukod kun mopiyong ba lang ang mga tawo sa tataw nga pagbaboy sa atong balaod. Masukod kun kalawaton ba lang sa publiko ang ingon niini nga klase sa mga politiko.
Kun di gyud mapugngan si Pe posibleng hangtud sa ilang kamatayon ang atong mga konsehal sa dakbayan magpabilin sa ilang pwesto.
Kay kinsa ba unya’y makapugong sa ubang mga konsehal nga mobalhin sab og distrito human sa ilang termino aron makapadayon sa ilang kahakog sa pwesto.
* * *
- Latest
