Upat ka Benedict sa Simbahan

Di si Pope Benedict XVI ang unang Pope Benedict nga niluwat gikan sa katungdanan. Nagsunod lang sa iyang sangay si Pope Benedict IX. Kinsa nikanaog sa iyang trono sa Roma niadtong 1045, o 968 ka tuig ang nilabay.

Apan samtang way makalalis sa mga sukaranan sa resignasyon sa bag-ong Benedict, nangalisbo ang mga sirkumstansiya sa pagbiya sa karaang Benedict. Duha ka seryusong kahiwian ang nahilambigit sa resignasyon ni Benedict IX: Gipasanginlan siyang nibiya aron makigminyo og usa ka babaye; ug gipasanginlan sab siya nga nibaligya sa katungdanan ngadto sa iyang maninoy nga maoy nipuli niya pagpangu sa Simbahang Katoliko.

* * *

Si Benedict IX gihulagway nga usa sa labing eskandaluso nga Santo Papa. Gitumbok nga nakatungtong sa katungdanan di tungod sa kaalam sa relihiyon kun dili tungod sa iyang gamhanang mga koneksiyon. Dunay labing menos unom ka Santo Papa sa upat ka henerasyon sa iyang mga uyoan ug mga apohan.

Si Benedict IX ang bugtong Santo Papa nga katulo mohupot sa puwesto. Unang nakatungtong sa katungdanan niadtong 1012 dihang 11 anyos pa. Human pasanginlang namayot, nanglugos ug nanapaw, gipalagpot niadtong 1036 apan nakabalik ra sab dayon. Napalagpot sa 1044 apan nakasakmit sa puwesto pinaagi sa puwersa niadtong 1045. Kanus-a gibayran sa iyang maninoy nga si Padre John Gratian nga nahimong Pope Gregory VI. Gisakmit niya pagbalik ang katungdanan niadtong 1046 dihang giingong gibalibaran sa babaye nga iya untang pakaslan.

* * *

Di hinuon si Benedict IX ang gipahinungdan ni Benedict XVI sa iyang ngan. Kun dili si Pope Benedict XV. Kinsa gipasidunggan niya nga maisugong “Propeta sa Kalinaw” tungod sa malampusong pagpanimon sa Simbahang Katoliko sa gubot nga katuigan sa World War I. Laing gipahinungdan sa iyang ngan mao si Saint Benedict sa Nursia, ang nagtukod sa mga monasteryong Benedictine sa Uropa ug ubang bahin sa kalibotan.

Gitanyag ni Benedict XVI ang iyang pamunoan walo ka tuig ang nilabay paghusay sa mga panagsungi ug paghimo ni Kristo nga sentro sa bag-ong panahon.

* * *

Ang walo ka tuig nga pamunoan ni Benedict XVI napakyas paghusay sa mga panagsungi di lang tali sa mga Katoliko ug ubang relihiyon. Kun dili, ug labi na, sa away sud sa simbahan. Nga nisangpot sa pagkagiw sa nagkadaghang mga Katoliko. Tungod sa iyang kapakyas pagsilot sa mga pari nga gipasanginlang nangabuso sa kabataan ug kababayen-an.

Si Benedict XVI mahimong mokanaog hinuon sa kasaysayan sa paghimo og modernong sukaranan: Ang pag-retiro gikan sa katungdanan, nga mahimong huptan sa tibuok kinabuhi, tungod sa kahimtang sa panglawas. Mahimong naglikay nga masusama sa iyang gisundan, si Pope John Paul II, nga namatay sa katungdanan. O mahimong nakumbinser nga panahon nang mopadaplin alang sa mas takos nga bag-ong liderato.

* * *

Email: [email protected].