EDITORYAL - Ang pag-resign sa Sto. Papa sa Katoliko

Di angay  kabalak-an  ang  pag-resign  sa Sto. Papa  sa katungdanan  tungod  sa iyang  edad  nga  maoy  sukdanan  sa  lihok  nga maabot  sa iyang  lawas.

Ang kadaghan  sa maayong  laki  nga  opisyal  sa simbahang  Katoliko maoy  mopadayon  sa  katungdanan   pagdala  sa rinda  sa simbahan.

Di  usab  angay  kabalak-an  sa  mga  membro  sa  simbahan  kun  mopahuway  ang  lider  niini  tungod  kay  magpabilin  ang  ilang  kalig-on  sa  pagsunod  sa mga  doktrina  sa maong  simbahan.

Wa  usay  tagna  nga  napatik  sa Biblia  nga  mawagtang  ang  karaang  relihiyon  sa kalibotan  nga  gipasakopan sa usa  ka bilyon  kapin na  ka  tawo.

Sa  pagsaka  ni  Cristo  sa langit  ug  sa  pagkahurot  og  kamatay  sa  Iyang mga  Apostoles  nga maoy  nagdumala  sa gitukod  ni Cristong  pundok  sa  mga tawong  nag-alagad  Kaniya  ug  sa Dios, didto  magsugod  ang relihiyong  Katoliko  nga  mipatuman  sa kaugalingon  nilang  pagtulon-an  o doktrina  nga  maoy  gipasunod  nila  sa ilang  mga  membro hangtud  karon.

Sukad  niadtong   panahona may 20  kapin  na  ka siglo  ang  edad   sa kalibotan   human  sa kamatayon  ni  Cristo  ug  ang  paglipang  sa mga membro  niini  di  na  mapugngan.

Kun may  mga  membro  sa  simbahan  ni Cristo  nga  milutaw dinhi  sa nasud  sayo  sa ika-19  nga siglo, pipila  ra  ang  nakaalinggat  niini ug  kasagaran  sa  mga  mipasakop  ning maong  relihiyon gikan  sa Katoliko.

Sa pagkakaron  nagkalainlain  ang  relihiyon  nga  misulbong  sa kalibotan nga  maoy  nakapalibog  sa tawo  kun  hain  gyud  ang  relihiyon  nga  gitukod  ni Cristo.

Maoy  relihiyong  gitukod  ni  Cristo   niadtong  dinhi  pa  sa yuta , ug  gidumala  sa Iyang  mga  Apostoles  sa pagsaka  Niya  sa langit.

Sud  sa 18 ka siglo wa igdungog  ang  maong  relihiyon hangtud  nga  mibangon  kini  pag-abot  sa ika-19 ka siglo nga    gidumala  karon  sa  mga  tawong  gipiyalan  ni  Cristo ,  pinaagi  sa tagna  sa Biblia.

Sa  bahin  sa Katoliko  magpadayon  ang  pagsulbong  niini kay  ania dinhi  ang  tanang  datu, tanang  maalamon   ug  gamhanang  mga  tawo  sa kalibotan.

Kun  mo-resign  man  ang  kasamtangang  Sto. Papa  nga maoy  lider  sa  maong  simbahan, daghan  kaayo  ang  kaantigo  mopadagan  ning maong  pundok   ug  magpadayon    kini  hangtud  sa  pagbalik  ni  Cristo sa  adlaw  sa paghukom.