Maayo pa’g ilisan

Ako na nga gitug-anan si Mayor Michael Rama sa problema karon nga pwerteng dugaya na nga mahibaw-an sa resulta kun adunay ipahigayon nga drug test sa mga kawani sa City Hall.

Maayo unta og tinud-on ni Mayor Rama nga makigtigum siya sa mga opisyal ug sakop sa City Office for Substance Abuse Prevention (COSAP) aron makorehean dayon ni.

Unya lain pa nga angay’ng tan-awon sa mayor kun ngano nga kadaghanan sa mga kawani nga mapositibo sa kinalit nga drug test, ma-negative man sa confirmatory test.

Tiaw mo, usa ka semana na lang wala pa makatug-an ang COSAP kun pila sa 20 ka kawani sa Division for the Welfare of Urban Poor (DWUP) nga ilang gi-drug test ang napositibo.

Wala kaha maglangan-langan lang kining private drug testing company nga gi-hire sa City Hall mao nga dugay mahibaw-an ang resulta?

Unsa kaha’y rason nga daghan man sa mga napositibo sa initial drug test, sama adtong mga kawani sa CITOM, na-negative man sa confirmatory test.

Angay tingali nga ilisan nato kining gikuha ninyo nga drug testing company mayor kay mentras sayo pa sa tuig.

* * *

Naminaw ko dihang si Konsehal Roberto “Bob” Cabarrubias gi-interview sa radio kabahin sa iyang mga accomplishments kun unsay iyang nahimo atul sa iyang pagka konsehal sa dakbayan.

Sa laktud, nakumbinsir ko sa iyang pamahayag kay gibatbat man g’yud ni Bob ang iyang mga nahimo. Apan dili ko makabotar ni Cabarrubias kay dia man ko sa north district.

Padayon BobCab sa mga maayo nimo nga binuhatan. Ang nakaayo aning Bob kay dili hambugero nga pagkatawo. Sa akong paniid, mitrabaho ra g’yud ni siya para sa katawhan.

* * *

Uy, nagsugod na man g’yud karon ang pangampanya sa mga kandidato pinaagi sa pulong-pulong ug pagpanglamano, akong awhagon ang mga kandidato nga  dili maayo nga magsaba-saba sila sa ilang paghimo og hand-shaking.

Nakadungog man gud ko nga adunay mireklamo ang mga lumulopyo sa Barangay Suba kay daghan ang natulog pa kay Sabado lagi kagahapon apan napugwat sila kay gigamitan g’yud og loud speaker ang pagpahibalo nga dunay mga kandidato nga manglamano.

Paita uy. Kun manglamano mo sa sayong buntag, lakaw lang nga dili magsaba-saba, bisan megaphone ayaw gamita. Ang uban diha magpatingog sa siren sa megaphone samtang nagkuyog-kuyog sa mga kandidato.

Sa laktud, makatugaw mo sa mga tawo nga matulog pa unta kay duna may mga tawo nga gabii ang trabaho. Wala ba kamo mahadlok nga sila dili na hinoon moboto kaninyo?