Patas nga kampanya unta

Napanid-an nako nga samtang abtik kaayo ang mga sakop sa Cebu City Office for Substance Abuse Prevention (COSAP) nga mohimo’g  kinalit nga drug test, dili abtik ang ubang opisyal nga moaksyon niadtong ma-positibo sa drugas.

Kun ari ka mangutana ni Celso Esteban Jimenea nga maoy assistant chief sa Human Resource Development Office (HRDO) nga maoy in-charge sa mga kaswal nga kasagaran g’yud maoy mapositibo sa drug test, miduso na kuno sila og kaso batok sa hingtungdang kawani didto sa City Legal Office.

Apan kun mangutana ka ni City Legal Officer Joseph Bernaldez, ang iyang opisina nakadawat man tuod og report kabahin sa mga kawani nga napositibo sa drugas apan pipila ra kabuok.

Kinsa may namakak niini? Si Teban o si Joseph? Gipangayoan nako og report si Teban kon Mr. Jimenea igo lang miingon nga “basta naa mi report, unya na lang.”

Ingon niini ang batasan aning Mr. Jimenea. Kaniadtong 2001, duna sab ko’y gipangayo nga dukomento nagdiki-diki paghatag. Mihatag lang siya dihang gihimoan nako og formal request ug giingnan nga ikiha nako kun dili siya mohatag.

Ang ako man gud mao nga gusto nako sutaon kun matinud-anon ba ang mga opisyal sa dakbayan sa paghimo’g kampanya batok sa mga kawani nga mogamit og drugas.

Si Mayor Michael Rama mibalik-balik sa pag-ingon nga dili gayud siya ganahan nga makig-uban og trabaho sa mga drug users, ambot og tinuod ba g’yud ‘sab.

Angay na tingali nga mangayo’g report si Mayor Rama kun pila sa mga kawani nga napositibo sa kinalit nga drug test sukad sa iyang pag-asumier pagka mayor nga nataktak sa katungdanan.

Nagduda man gud ko nga pulos lang kini pasiatab nga dunay kinalit nga drug test apan kun adunay mapositibo unya lig-on og backer nga nagpasulod kanila sa City Hall, dili lang taktakon.

Hagit kini nako ni Mr. Jimenea nga ikaw man g’yud ang gisaligan sa mga kaswal nga kawani sa City Hall, hatagi og report ang mga sakop sa media kabahin niini.

Putla na kanang imong batasan nga modayon lang og ingon nga “unya na lang.” Kun ibutang nako nga ako ang anaa sa pwesto aning Mr. Jimenea, (pero klarohon nako nga wala ko mangandoy) lihokon dayon nako ang papeles nga matangtang kining mga drug users nga kawani sa City Hall.

Kana maoy angayan nimo nga buhaton dili kay abtik ka lang nga mopataktak sa kawani sa CITOM bisan og walay rekomendasyon gikan sa iyang hepe, tungod lang kay dunay report nga midapig ni sa kaatbang sa Team Rama.