EDITORYAL - Ang number game nga matang sa sugal

Nagkalainlain  ang  matang sa sugal  karon   dugang  sa  naandang sugal   sama  sa hantak,  tari, mahjong, baraha, masiao,   sugal  sa periahan ug karon  naay swertres  ug  uban  pang  number game  nga  anaa  sa mga  dagkong balay  sugalan nga nagkalainlain  na  ang  ngalan. 

Sa  hantak,  usahay  may  antogiro  nga  mosuway  pagpanikas, apan  dali rang mailhan,  bisan  sa tari, usahay  may  mosuway  pagsurambaw  pinaagi  sa di  tinarong  nga  pagtaud  sa buwang  ug  ang  tag-iya  sa manok  adto  mopusta  sa kontra  apan  dali rang masakpan.

Ang  lisud  kaayong hisakpan  kansang  misimpatiya  sa maong  matang  sa sugal  maglisud  pagbiya  gumikan  sa kabarato  ray  puhonan, mao  kini  karong masiao  ug  swertres.

Barato na  unya  usahay  makadaug  ka, aw kaayo na  niana bisan  tuod  daan  nang  gidili  sa Dios  ang  pagsugal.

Sa kabarato  sa pusta  minilyon  ka  tawo  ang  maglumba  sa pagpusta  busa  kinsa  bang  tag-iyaha  sa sugal  ang  di  moburot  sama  sa sugal  nga  lisensyado  sa goberno.

Sa  minilyon  nga  ginansya  sa goberno  sa sugal  nga  lisensyado  dali  ra kaayong  pangayoan  og tabang  sa  mga pasyente  nga  maglisud  sa pagbayad  sa obligasyon  sa hospital.

Maayo  sila  mohatag  sa   mga  panginahanglan  sa mga tambalanan  ug  bisan  sa LGU  sama  sa mga ambulancia, ug  uban  pa, ngano  man  tungod  kay di  mahitabo  nga maalakansi  sila.

Adlaw-adlaw  nagbaha  ang  ilang  ginansiya  tungod  kay  ang  tawo mosuway    man  sa  pagpamasin  nga  sila  makadaug.

Kun  unsa  kadako  ang ginansya  sa goberno  nga nagpadagan  sa legal  nga sugal, ingon usab  niini  ka  tambok  ang  bulsa  sa  pribadong  tawo  nga nagpadagan  og  illegal  nga  sugal.

Apan  ma-legal  man  o illegal  nga sugal, naglisud  sa pag-analisar  ang  mga  sugarol  sa  tinuod  nga estratihiya  sa nagpadagan  sa maong  sugal.

Kun mat-an  man  ang  sugarol, mas mat-an  pa  ang nagpadagan  sa sugalan mao   nga  kun  maayo  ka  og  analyses, nganong  di  man  ka  mangutana  sa imong  kaugalingon.

Kun ikaw ang nagpadagan  sa sugal,  sa kadaghang  numero  nga  imong  ibaligya, asa may  imong  padag-on kun  ang  tanang  kombinasyon  sa numero  mahalin, ang  labing  daghan  og  pusta  o kadtong  numero  nga  way miposta?