Sugod kagahapong adlawa bag-o na ang liderato sa Bureau of Customs sa Port of Cebu human mapahigayon ang change of command kagahapon. Apan ang maong kausaban sa liderato sa Port of Cebu gikasagmuyo sa mga sakop ug opisyales sa Chamber of Customs Brokers Inc..
Ang Chamber of Customs Brokers Inc. gisayangan sa maayong performance nga gipakita ni collector Ronnie Silvestre sa Bureau of Customs sa Port of Cebu nga mawagtang lamang. Si collector Ronnie Silvestre mao ang responsable sa pagkuha sa 8.677 ka bilyon nga target collection ug sa 13 milyones ka pesos nga dugang pang collection sa nahisgotang buhatan.
Sa ilang resolusyon nga gipalabang gidayig sa Chamber of Customs Brokers Inc. ang paagi sa pagpadagan ni collector Silvestre sa Bureau of Customs sa Port of Cebu tungod sa mga maayong kausaban nga gipatuman ug sa maayong liderato nga gipakita niini. Ang resolusyon midugang sa pag-ingon nga gisunod ni collector Silvestre ang tumong sa Bureau of Customs nga mapataas ang ilang collection ug maminusan kun dili man mawagtang ang smuggling sa Sugbo.
Ang gihimo ni collector Silvestre mao ang hinungdan kun nganong sulod sa tulo ka tuig nga paglingkod niini sa Port of Cebu kapila lang ta makadungog og balita sa smuggling, lahi kun ikomparar kaniadtong wala pa siya molingkod diin matag karon ug unya grabe kaayo ang smuggling nga miresulta gani sa mga congressional investigation.
Ang Chamber of Customs Brokers Inc. usa ka professional organization sa mga customs brokers nga accredited sa Bureau of Customs kansang tumong ug tuyo mao ang pagtabang sa publiko ug sa pagpanalipod sa interest sa gobyerno.
Sa ako nang giingon sa miaging isyu ning akong lindog nga makalibog ang liderato ni Customs Commissioner Rufino Biazon tungod kay daw sama sa gisilutan ang mga performing collectors ug gipangga ang mga wala makahimo sa ilang mga gimbuhaton. Ambot ug unsay rason niining tanan. Dili kaha kay layo ra sa dughan ni Commissioner Biazon si Silvestre o ba kaha aduna pay mas lawom pang nagpaluyo niini nga sila lang duha ang nasayod.