Ang premyo

Adunay balaud nga mohatag og P100,000 sa usa ka Pinoy o Pinay nga buhi pa inig-abot  sa 100 ka tuig ang ilang pangidaron. Ginganlan kini sa uban nga survival prize.

* * *

Di pa lang dugay dihay usa ka babayeng senior citizen nga mipahibawo kanato nga mosuwat siya ngadtong P-Noy aron sa pag-propose nga ang P100,000 himoon og usa ka milyon ka pesos.

* * *

Matud niya gamay ra man ang makaabot sa edad nga 100. Ug puno pa niya pila na man lay balor sa P100,000 inig-abot sa uban sa pangidaron nga 100 ka tuig.

* * *

“Ning panahon nato ron,” suma pa ning atong senior citizen (kang kansang ngan ato ra gipugngan), “gamay ra ang usa ka milyon, kay gani binilyon naman ang kanunay hisgutan labi na sa mga korap sa gobyerno.”

* * *

Ang dakong survival prize sa mga sentenaryan makatabang sab kuno pagpalambo sa industriya sa Herbal Medicinal Supplements tungod kay ang mga edaran na maninguha nga motaas pa ang kinabuhi pinaagi sa pag-inom niining herbal supplements.

* * *

TRIVIA. Mangumusta kita sa atong mga higala diha sa Carcar City ug mga kasikbit nga dapit. Salamat sa inyong  suporta sa Banat News.”