Biktima ko uy!

Dili g’yud imposible nga malutsan ang mga gwardya kun dunay tawo nga gusto nga magdala og armas sulod sa balay-patigayon o kaha opisina nga ilang gibantayan.

Malutsan pa man gani kining hambugero ug estrikto kaayo nga mga sakop sa Presidential Security Group (PSG) nga maoy mobantay kun mobisita ang presidente sa usa ka dapit.

Dili lang nako idetalyi kun giunsa ug kinsa ang tawo nga nagdala og armas nga nakalusot bisan sa grabeng pagrekisa sa mga PSG kay basin unya og dili makagusto nga gibutyag ang iyang abilidad.

* * *

Nganong daghan man sa mga opisyal sa kabarangayan dinhi sa dakbayan ang wala mo-request og mga infrastructure projects nga gastohan unta gikan sa Local Development Fund.

Tinuod ba nga dili sila maantigo kun unsaon nga makaangkon sila’g proyekto nga gastohan sa LDF? Matud ni Engr. Oscar Abordo sa Cebu City Development Council nga dunay uban nga mi-request og project apan gi-reject kay kuwang og dukomento.

Pastilan, kamong mga opisyal sa barangay nga dili makamao sa maong gimbuhaton pangayo mo’g tambag sa mga suheto. Tan-awa dili ba alkanse mo sa ubang barangay kay 30 ra ang makapahimulos.

* * *

Subo kaayo ko pag-abut nako sa balay kaniadtong Domingo sa gabii kay gilungkab ang akong opisina. Wala magsilbi ang duha nako ka iro nga diha sa gawas kay nagtoo ko nga silingan ra nako ang kawatan.

Kahilakon tawon ko sa kaguol kay ang kwarta nga nakawat loan kon huwam intawon kadto nako sa Pag-IBIG nga nakuha kaniadto pa’ng Huwebes. Duna ko’y bayran apan Lunes na unta nako bayran human sa Sinulog.

Didto ra nako ibutang sa drawer sa akong opisina ang kwarta apan anugon kay nakawat ra. Magpasalamat ko sa mga sakop sa Theft and Robbery Section (TRS) ug Scene of the Crime Operation kun madali unta nila paghuman ang imbistigasyon ug mahibaw-an kinsa ang naghimo.

Gipakuhaan man gud nako og fingerprint ang tawo nga akong gikatahapan. Giutingkay pag-ayo ang akong opisina nga nahimutang sa second floor.

Maayo gani kay gituyo namo nga gisirad-an ra namo ang usa namo ka iro didto sa sulod sa balay mao nga sa opisina ra kutob ang kawatan. Kun wala pa ang iro didto sa sulod, mas daghan pa siya og makawat kun nakasulod siya sa among kwarto.

Klaro kaayo nga nagpraktis pa ang kawatan kay gawas sa kwarta daghan pa nga kawatonon didto sa opisina, apan ang iyang napilian mao ra ang printer ug duha ka selpon.

Sagdi lang, mapositibo gani ang resulta sa fingerprint examination, makita ra sa kawatan kun unsay akong buhaton.