Gamay’ng negosyo

Usa ka batan-ong magtiayong Sugbuanon sa Manila mouli gyud sa Sugbo matag Pista Senyor bisan kuno limitado ang ilang budget.

* * *

Matud ni Danny ug Johanna (apelyido gipugngan gumikan sa hangyo sa magtiayon) duna sila’y paagi nga mabawi ang ilang travel expenses lakip na ang plite sa barko.

* * *

Sa ilang pag-anhi moda sila’g mga pitse-pitse nga mga butang nga ilang ibaligya dinhi sama sa mga homemade nga pang-snack, kuwentas nga hinimo sa liso sa atis, wooden bracelets, headbands, etc.

* * *

Kining mga produktuha sila rang duha naghimo sa ilang  pinuy-anan sa Sampaloc, Manila. Kining mga handicrafts items usahay sa barko pa gani kahalinan na.

* * *

Dugay nang nanimuyo sa Manila si Danny ug Johanna diin ang ilang palangitan-an mao ang handicraft business. “Ginagmay’ng negosyo ra gud,” matud ni Johanna. “Apan nakahatag namong duha og komportableng kinabuhi.”

* * *

Si Danny lumad nga Carcaranon samtang si Johanna taga Mandaue. Sa Manila sila nagkaila apan dinhi sila gikasal sa Sugbo pito ka tuig na nga minglabay. Pulos sila second year college students dihang miundang sa pagtungha.

* * *

TRIVIA. Malipayong Pista Senyor ngadto sa atong mga higalang magbabasa ning Banat News. Daghang salamat sa inyong walay hunong nga suporta kanato.