Hubo nga pantalan

Di na gyud tang kapangiyugpos sa kahimtang sa panahon. Bisan sa pasalig sa Philippine Atmosperic, Geophysical and Astronomical Services Administration (Pagasa) nga gamay ra ang kahigayonan nga mahimong bagyo ang low pressure area sa amihanang Mindanao, nikusog gyud ang hangin ug uwan ug nahimo gyong bagyong “Auring.”

Gihulagway sa Pagasa nga hinay rang hangin ug gamay rang uwan nga bawon ni “Auring.” Maayo na lang nga, sama sa naandan, nipakapin sila nga may kahigayonan nga mosangpot sa baha ug pagdahili sa yuta. Apan way nagpaabot nga modagko pag-ayong bawod ug mameligro pag-ayong usa ka barko nga nagbase sa Sugbo.

* * *

Ang MV Zamboanga Ferry, nga gipanag-iya sa George and Peter Lines Inc., gikan sa Zamboanga City ug modunggo na unta sa pantalan sa Dumaguete City, ang ulohan sa atong silingang lalawigan nga Negros Oriental, dihang gihapak og dagkong bawod, naanod sa mas mabaw nga bahin, napawongan sa makina ug nasangad.

Pasiunang imbestigasyon sa Philippine Coast Guard (PCG) nagbutyag nga wa matarong paghigot ang pisi nga moggaid unta sa barko ngadto sa pantalan. Maayo na lang nga way bisan usa sa kapin sa 200 ka pasahero, nga naglakip sa 34 ka masuso ug mga bata, ang naangol sa panghitabo.

* * *

Di ni unang higayon nga may naapiki nga barko sa pantalan sa Dumaguete. Atol sa pagkusukuso sa bagyong Sendong niadtong Disyembre 2011, may barko sang nasangad duol sa pantalan. Niangkon ang lokal nga mga opisyal nga mahimong ibalhin na lang gyong pantalan kay bisan way bagyo may mga aksidente gihapon sa mga barko, ang pipila nakaguba gyud gani sa pantalan.

Si Captain Anelito Gabisan, pangu sa PCG District sa Central Eastern Visayas, nipasabot nga tungod ni sa peligruso nga nahimutangan sa pantalan. Mas dagko ang bawod kay hubo ang pantalan sa bisan unsang panagang tungod sa kalayo ra sa isla sa Siquijor ug sa isla sa Sumilon sa habagatang Sugbo.

* * *

Sukwahi sa pangangkon sa Coast Guard, dugay kaayo silang nakatabang sa mga pasahero sa nasangad nga barko. Naabtan una og dul-an sa duha ka oras ang pagka tay-og sa mga pasahero sa way kukaluoy nga paghapak sa dagko ug masuk-anong mga bawod sa wa pa mahukmi nga luwason sila. Ang unang nakahakot sa mga pasahero ginamit ang gagmay kaayong bote di ang Coast Guard. Kun dili ang rescue workers sa Dumaguete nga gipangulohan ni Mayor Manuel Sagarbarria.

Wa hinuoy sukaranan ang pagtulisok sa PCG sa pagtugot sa paglawig sa MV Zamboanga Ferry. Wa pay bagyo ni bisan unsang public storm warning signal nga naluwatan sa pagbiya sa barko sa pantalan sa Zamboanga City. Angay hinuong palambuon sa PCG ang katakos pagtabang sa maapiking mga barko bisan way bagyo.

* * *

Email: [email protected]