Dili ko bar topnotcher!

Yes, dili ko topnotcher. Unsaon pag-top nako sa  bar, nga waa man ko mo-bar. Ug unsaon pag-bar nga commerce graduate man ko, dili law graduate. Ug waa sad ko ma-CPA kay hadlok kong mo-take sa board. Hadlok ko kay seguro gyud kong mahagbong.

Ingon ko ini ka bugo’ ug ka-uplok. Maoy hinungdan nga waa gyud ko mag-apil-apil  og hisgot niining nahitabo karon sa Capitol. Nagkinahanglan kini’g mga legal minds.

To an ordinary mind, sama sa akong mind, makalibog kining nahitabo karon sa Capitol. Pananglitan, naglibog ko ngano nga ang usa ka suspended elected public official, dili diay kono kinahanglan nga manaug, kay matud nila, ang functions ra kono maoy gi-suspenso, dili ang position.

Di ka maglibog ana, Dro? Waa konoy balaud nga nag-ingon nga kinahanglan manaug gayud ang usa ka suspended nga opisyal. Sa akong nadunggan, mora man sad og walay balaud nga nagbuot nga kinahanglan di gyud manaug ang usa ka suspendido nga public official.

Makalibog, di ba? Unya, unsa man diay kapuslanan sa usa ka suspension order kun mahimo ra diay nga kini tumanon o dili?  Waa ba diay mahibawo ang Malacañang niini nga mahimo ra diay nga magpabilin sa puwesto ang usa ka suspendido nga public official?

Samut ang kutaw sa akong libog ini! Laing nakapalibog kanako mao kining ilang pag-ingon nga tungod kay si Vice President Binay wala madayon ang pagka-suspenso, mahimo sad nga dili ilahos ang pagka-suspenso sa Cebu governor.

Unsa man diay labut sa kaso ni Binay ug sa kaso sa atong gobernador? Sa ubos nakong panabot, naka-secure dayon si Binay og TRO, ug wala pa makatudlo og puli niya. Unya, sa inato ug tinamban nakong pagsabot, ang kang Binay was a preventive suspension, samtang sa atong gobernador, penalty na kono – sa ato pa, waa nay i-prevent.

Paita gyud ning di ta abogado uy, maglisud gyud tag sabut. Ambut sag ngano nga silang mga abogado di man sad magkasabot? Tungod ba kaha kay dunay ordinaryong abogado ug duna say mga topnotcher?

Sa among  panahon, dihay ginganlan nga mga abogado de campanilla. Bilib kaayo mi nila. Tinuod gyud nga mga bright. Pirmeng kadaog sa mga kaso. Karon, nagka-bright ang atong mga abogado … mga abogado de campana na gyud. Maoy hinungdan nga samot nga di magkasabot.

Due process kono. Rule of Law kono. Waa sad kaayo ko kasabot ini. Di ba diay due process ang pag-suspenso sa usa ka public official, after nakit-an kono nga sad-an?  Ug subay ba sa rule of law ang pag-defy sa maong suspension order?

Makalibog kining tanan sa usa ka yanong lungsoranon sama kanako nga walay hibangkaagan sa pamalaud. Hinaut nga silang adunay mga kasinatian sa balaud, unta, sa kaulahian, magkasabot ra … for the good of Cebu … sa walay pagtan-aw kinsay masakitan.

After all, dili man ni personal nga isyo. Dili family matters. Dili gani political. Dili Gwen vs. Agnes .. kundili, may kalabutan kini sa tinguha ni Presidente Noy pag-establish sa usa ka matuwid na daan sa atong panggobiyerno. Sa ato pa, beyond politics.