Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.
Panahon sa homily, ang pari sa Sto. Niño Basilica Church nangutana: “Sala ba ang masuko?” Ako nga nakadungog, haskang daliang nakatubag: “Depende!” Maoy milanog didto sa akong kahiladman. “Depende kun unsay sinugdanan ug diin gikan ang kasuko?”
Kun ang sinugdanan sa kasuko mao ang gugma, dili kini sala. Kay ang mga ginikanan nga nahigugma sa ilang anak, dili gyud makatugot nga mosimang kini gikan sa matarong dalan sa kinabuhi nga ilang gitudlo. Busa, kun makit-an kini nilang maghuboghubog, manigarilyo, mag-adik-adik ug uban pang daotang buhat nga makalaglag sa lawas ug kalag ila gyud kining kasab-an, diin ang maong kasaba kasagaran ma-mis-interpret sa anak nga usa ka kasilag (hatred). Wala nila makita nga ang tuboran sa maong kasaba nagagikan sa kasingkasing nga nagmahal. Hinungdan, nga dihang nalantawan sa mga parents nga ang gipadulngan sa anak usa ka mangitngit nga bung-aw sa kamatayon, misiyagit kini taman sa ginhawa nga dili mopadayon. Sa ato pa, ang maong siyagit...ang maong kasuko...puno sa gugma ug dili kasilag. Busa, ang maong kasuko dili maisip nga usa ka sala.
Dihay usa ka higayon nga gikasuk-an ko sa among labaw sa trabahoan. Puwerte gyud niyang pangasaba. Naminaw lang ko sa kainit sa kalayo nga iyang giduslit sa akong dughan. Gipasagdan ko ang iyang pagdilaob hangtod nga sa kadugayan napalong ra kini. Dihang bugnaw na ang iyang kainit, gisultihan ko siya: “Salamat, Boss, sa imong mga kasaba. At least, I know you love me.”
Wa makatingog ang among manedyer. Daw kandila siya nga nalanay. Wala siya magtuo nga mao toy akong itubag. Wala dangtig tulo ka tuig, na-promote ko. Tungod kay ang maong kasuko nga iyang gibunal nako gikan diay sa iyang kasingkasing, usa diay ka gugma. Mao nga gisunod ko. Ug ang maong pagsunod namungag kalipay.
Kun ang nag-awhag sa kasuko mao ang gugma sa atong kaugalingon ug sa atong isig ka tawo, diin ang tumong mao ang kaayohan sa tanan, di kini ilhon nga usa ka sala. Hinuon, ikalipay pa kini sa Ginoo. Gani, dihang pagsulod Niya sa templo, pagkakita Niya nga ang balay sa iyang Amahan gihimong merkado sa mga magpapatigayon, nasuko sab Siya. Iyang gipang-alimbuwad ang mga baligya, gibunalan ang mga gipanindang mananap ug gibugaw palayo ang mga negosyante. Kini tungod sa dakong gugma ni Hesukristo ngadto sa Iyang Amahan.
Apan kun ang tinubdan sa kasuko mao ang kasina, kasilag, selos ug pagdumot nga moresulta sa paghikog, pagpatay sa atong isig ka ingon ug pagmugnag mga butang nga makadaot sa tawo...ang maong tipo sa kasuko, usa ka sala...usa ka dakong sala. Dako kaayo kining tulobagon nato sa higayon nga moatubang na kita sa atong maghuhukom aron hukman. Busa, samtang di pa ulahi ang tanan, kun kita masuko man, seguroha nga nasuko ta tungod sa atong dakong gugma sa Ginoo, sa atong kaugalingon ug sa atong isig ka tawo. Buwahan maangkon nato ang kinabuhing dayon nga giandam sa maghuhukom sa mga binuhat nga misunod sa mga pulong nga gibilin Niya dinhi sa yuta.