Atong pagahisgutan ang kinabuhi sa tawo. Dili malikayan ang kasuko, kalagot o tension ug kahiubos, pero nagkalainlain ang reaksyon sa mga tawo. Adunay tawo nga kun masuko, mokusog ang pulso, motaas ang presyon, mamuwa ang nawong ug mangurog ang kalawasan. Apan ang uban tawo dili ing-ani ang reaksyon, pero magsakit ang ginhawaan o tiyan, unya naa pay ulser nagdugo.
Ang uban sad, sa sige’g kasuko, permi tensyonado na sakit sa kasingkasing. Naa pay gi-diabetes, ang uban wala pero nagkasakit sab sa kanser. Busa di makaayo ang epekto sa ka suko o kalagot. Kun may hayblad o tandugon sa kasingkasing ang tawo, dali ra maugtas ug mamatay. Busa ipahiluna kanunay sa isip nga magkalma ug magkontrol sa kasuko nga di magpalabi sa gibati. Madaut ang lawas mo tungod lang nianing negatibo nga kinaiya sa sobra ka masuk-anon.
Atimanon pag-ayo ang atong panghunahuna o sikolohikal nga permi ibalanse. Dili kay kulang o wa sa hustong pagkaon, unya sige lag trabaho iyawat aron modaku ang kitaong kuwarta apan way kapuslanan kay hutdon man po’g kaon sa gasto inig kasakit. Likayan ang pagpagutom, tagay nga way kaon, sige’g buwad sa init, magmukmok nga way gibuhat, masinahon, bagulbolon, sapoton ug uban pa, kay kini maoy mopabukal o mopaulbo sa tension nga mosangpot sa nerbiyos breakdown nga kuyaw dili na ta makapugong sa atong pangisip, di na magkadimao ang pamatyag aron mabatonan ang malipayon nga kinabuhi.
Atong pugson nga idisiplina ang husto nga pagsagop sa kinaiya nga positibo sama sa pagkamasinabuton, manggiluloy-on, matinabangon ug kalma, mabugnawon sa pagsulti nga may mensahe sa gugma sa isig katawo. Kun kini ang himuon tang istilo sa kinaiya, seguradong malinawon ta ug himsog pa.