Mauwaw baya ta

Dakung palpak ug makauuwaw alang sa administrasyon ni Mayor Michael Rama ang nahitabo nga grabeng kalangay sa pagpanghatag sa cash assistance  ngadto sa mga magtutudlo sa publiko nga tunghaan dinhi sa dakbayan kaniadtong Biyernes.

Sila ra maoy nagpahibalo nga sa buntag, ang adto manghatag og cash assistance sa Labangon Elementary School alang sa mga maestro sa tunghaan nga nahimutang sa south district, ug sa pagka hapon alang sa mga maestra sa tunghaan sa north district adto sa Zapatera Elementary School.

Tiaw mo nga misayo intawon ang mga maestro, dunay uban nga mibangon og sayo ug ang uban wala gani mokaon kay aron makakobra dayon sila sa ilang cash incentive.

Apan naunsa ba nga naudto na lang, unya mihapon, wala gihapon mangabot ang mga pagador kon disbursing officers nga manghatag sa ilang tag P10,000 nga cash assistance kon bonus.

Ang problema diay mao nga dugay nga nakakuha ang mga kawani sa Treasurer’s Office sa dul-an sa P50 milyones nga gamitonon alang sa maong gastohan.

Nganong wala man nila kuhaa daan ang kwarta nianang Huwebes pa lang ug gibutang lang sa ilang safe vault? Ngano mahadlok mo nga kawaton ang kwarta diha sa City Hall?

Kun kana gani ang inyong rason, layo ra kaayo kana sa tinuod kay daghang gwardya diha nga makabantay. Unsa wala ninyo matan-aw daan ang maong problema nga dugay kamo makakuha og kwarta sa banko?

Espoko mo ba nga kilum-kilom na nga miabot ang mga pagador didto sa  distribution center – sa Labangon ug Zapatera Elementary Schools. Paita, sigurado ko nga dunay mga maestro nga nangasuko.

Mao diay nga giteksan nako si City Treasurer Emma Villarete ug si Konsehal Jose Daluz III nga sinaligan ni Mayor Rama sa Local School Board pareho sila nga wala motubag.

Pastilan, pangita mo og maayong paagi oy nga dili kadto mahitabo pag-usab. Alang ni Mayor Rama, tabla ra nga gipangitaan ninyo og isyu ang inyong kontra sa politika.

* * *

Wala gayud modayon sa paguba sa ilang kabalayan kadtong mga lumulopyo sa Sitio Laurente sakop sa Barangay Tejero kay wala na sila motoo nga tinuod ang pasalig ni Collin Rosell, hepe sa Division for the Welfare of Urban Poor (DWUP) nga hatagan sila og luna nga ilang kabalhinan.

Matud ni Rosell ug Raquel Arce, ang hepe sa City Hall demolition team, nga ang yuta nga ilang pabalhinan usa ka public land ug mahimo kini nga maangkon sa hingpit sa maong mga lumulopyo.

Ambo tog mahimo ba kay, bisan og abogado si Collin, dili ko motoo nga mahimo kini kay ang balaud naglatid nga ang makapahimulos sa gitawag og Free Patent Act mao ra kadtong mga actual occupants.