Puntil ug uban pa ang puntarya

Nagsaulog sa pasko ang pamilya ni Governor Gwendolyn Garcia sa Kapitolyo. Uban kaniya, mao sila si noy Pabling ug Esperanza, uban nilang mga anak, mga apo, mga apo sa tuhod ug ang pipila ka mga dumadapig nga miduyog usab sa pagsaulog sa pasko sa gobernadora.

Ang gobernadora ug ang iyang pamilya sa Kapitolyo nagsaulog sa pasko tungod kay dili buot ang gobernadora nga mokanaug sa Kapitolyo human siya suspensoha balig unom ka bulan sa iyang katungdanan. Ang iyang pagdumili sa pagtuman sa suspension order nga gipakanaug sa Malakanyang nakamugna og kaguliyang sa Kapitolyo ug nakapalibog sa mga empleyado ug pangulo sa mga departamento. Ang pangulo sa mga departamento ug mga empleyado naglibog kun si kinsa nila ni acting Governor Agnes Magpale ug suspended governor Gwendolyn Garcia ang ilang sundon.

Nganong gisuspenso man si gobernador Gwendolyn Garcia? Tugoti nga atong tubagon ang maong pangutana sa walay pagpabor ug walay pagtak-op sa atong mga dunggan ug mga huna-huna. Tugoti nga atong tubagon ang maong pangutana sa walay pagbotang og kolor sa partido nga atong nauyonan sa nagsingabot nga piniliay o ba kaha mga kaligutgot sa gobernadora.

Ang puntil ug ang gahom mao ang hinungdan sa pagsuspenso sa gobernadora sa iyang katungdanan balig unom ka bulan. Gusto sa Malakanyang nga ang iyang partidong Liberal ang makakupot sa puntil sa Kapitolyo ug sa gahom sa pagpadagan sa renda sa pangagamhanan niini. Importante kaayo sa partidong Liberal ang pagkuha sa puntil sa Kapitolyo tungod kay mao kini ang usa sa mga hinungdan kun nganong ang ubang mga mayor padayon kining misuporta sa gobernadora ug sa One Cebu nga partido. Ang puntil sa Kapitolyo ang hinungdan kun nganong kanunay nga gibusog sa gobernadora ang iyang mga kaalyado ug bisan ang iyang mga kaatbang sa politika maong gusto kining kuhaon sa partidong Liberal.

Sa pagkuha sa puntil sa Kapitolyo seguradong maluya ang gobernadora ug ang One Cebu busa may kahigayonan nga ilang malangkat ang gahom gikan sa gobernadora ug sila na unya ang mopadagan sa Kapitolyo hangtod sa 2016 nga presidential election. Ang lalawigan sa Sugbo kun wala ko masayop mao ang ikaduhang lalawigan sa nasud nga adunay pinakadaghan og botante. Nagsunod kini sa lalawigan sa Pangasinan kansang gobernador gisuspenso na usab sa Malakanyang. Si Governor Espino sa Pangasinan kontra sa Malakanyang. Busa klaro ug tataw ang dagan sa mga panghitabo. Hawanan sa partidong Liberal ang agianan ni Secretary Mar Roxas sa iyang pagpaingon sa Malakanyang.

Ang kasong usurpation of authority nga gipasaka sa namatay nang bise gobernador nga si Greg Sanchez gihimo lamang sa Malakanyang nga salimbong sa tinuod niining tumong o political game plan niini. Sigun sa hunghong sa akong amigong duwende niadto pa untang bulan sa Hulyo ipatuman ang suspension sa gobernadora apan gituyo kini sa pagpatuman niini lang Disyembre aron dili na gayod makabalik sa Kapitolyo si Governor Gwendolyn Garcia ug kun ugaling makakuha siya og injunction ug Temporary Restraining Order gikan sa Court of Appeals aron dili mapadayon ang iyang unom ka buwan nga suspension sa kasong usurpation, nag-ung-ong na usab ang suspension kaniya sa kaso sa CICC ug Balili property. Ang kasong usurpation nga nahimong basihanan sa pagkasuspenso sa gobernadora huyang pero ang mga kasong nagsunod niini adunay lig-on nga mga basihanan busa lisod nga panalipdan pero poyde nga malangaylangay hangtod sa pagkahuman sa piniliay karong tuig 2013 pinaagi sa duwa unta sa iyang mga abogado apan nausahan siya sa iyang mga kaatbang sa politika.

Hinuon, ang gobernadora ra usab ang mabasol sa iyang pagkasuspenso. Iya man ugod nga gihatagan og lutsanan o rason ang iyang mga kaatbang sa politika nga maoy malutsan sa pagbuwerta kaniya di, nabuwertahan tuloy.