Illegitimate nga anak adunay katungod nga mo-inherit

Ang inahan ug amahan obligado nga mosuporta sa ilang mga anak, legitimate man o illegitimate. Sila adunay obligasyon sa pagpakaon, paghatag og pinuy-anan, pagpa-eskwela ug sa paghatag sa uban pang panginahanglan sa mga bata. Ang illegitimate nga anak aduna say katungod nga mogamit sa apelyido sa iyang amahan. Apan ang pangutana kun aduna bay katungod nga mo-inherit ang illegitimate nga anak sa kabtangan sa iyang mga ginikanan? Kana nga pangutana ang atong tubagon karon.

* * *

Dear Atty. Divine,

Usa ako ka illegitimate nga anak ug naa ko magdako sa akong Lola. Ang akong mama aduna nay laing pamilya samtang ang akong papa aduna say iyang kaugalingong pamilya. Wa sila magsuporta nako ug ang akong apuhan maoy nagpa-eskwela nako karon. Maayo ang kahimtang sa akong mama kay ang iyang bana atua man magtrabaho sa gawas ug aduna sab silay mga negosyo. Ang akong pangutana atty. kun aduna ba koy katungod nga mangayo og suporta kaniya? Ikaduha nako nga pangutanan kun maka inherit ba ko sa kabtangan sa akong inahan nga aduna man siyay tulo ka legitimate nga mga anak? — Tony

* * *

Dear Tony,

Aduna kay katungod nga mangayo og suporta dili lang sa imong inahan lakip na sa imong amahan. Basi sa Article 105 sa atong Family Code kini naglatid nga ang mga ginikanan obligado sa paghatag og suporta sa ilang legitimate  ug illegitimate nga mga anak. Ug ang suporta nga angayan nilang ihatag naglakip sa tanang panginahanglan sa anak sama sa pagkaon, pinuy-anan, transportation, mga tambal, education ug uban pa.Ang maayo nimong buhaton karon mao ang pagpadala og demand letter ngadto sa imong inahan ug amahan aron sila makahatag kanimo og suporta. Samtang sa ikaduha nimong pangutana, yes, maka inherit ka sa imong inahan bisan pa kun aduna siya mga legitimate nga mga anak lakip na gani sa imong amahan. Ang illegitimate nga anak gikonsiderar kana sa atong balaod nga compulsory heirs busa dili kini mamahimong mahikawan sa iyang bahin sa kabtangan sa iyang mga ginikanan. Hinuon basi sa balaod ang ma-inherit sa usa ka illegitimate nga anak katunga lang sa share nga ma-inherit sa iyang mga legitimate nga igsuon. Ug ang imong bahin mamahimo lang nimong makuha kun patay na ang imong inahan o amahan. Busa samtang buhi pa sila, ang mga anak, legitimate man ug illegitimate dili pa makapanghilabot sa kabtangan sa ilang mga ginikanan. Daghang Salamat og Merry Christmas!— Atty. Divine

Alang sa inyong pangutana, ipadala lang sa Legal Corner sa Banat News or email sa [email protected]