Matapus ba gayud ang kalibutan karong adlawa sigun sa gituhuan sa uban? Alang kanako dili kini mahitabo kay walay nasayud kun kanus-a matapus ang kalibutan gawas sa Dios.
* * *
Nganong dugay man kaayong gisilbi kining suspension order batok kang Gob. Gwen Garcia? Wala ba kini tuyo-a?
Nakadungog na ako niining maong orden niadtong buhi pa si Department of Interior and Local Government (DILG) Sec. Jessie Robredo. Nagtoo ako nga wa kini masilbi tungod sa iyang hinanaling kamatayon.
Karon nga si Liberal Party (LP) president (on-leave) Mar Roxas nga mao nay kalihim sa DILG gisiguro na gayud ang pagsilbi sa suspension order niadtong Miyerkules. Gisugo usab si Bise Gob. Agnes Magpale sa paglingkod isip acting governor. Si Bokal Teban Daan, isip maoy nakakuha og labing daghang boto sunod kang Magpale, karon ang acting vice governor.
Unom ka buwan ang suspension ni Gob. Garcia. Sa ato pa dili na siya makabalik sa Kapitolyo hangtud sa Hunyo 19, 2013.
Morag gituyo paglangay ang pagsilbi sa suspension order aron gayud dili na siya makalingkod pagbalik sa Kapitolyo hangtud sa eleksiyon.
Tungod niining maong kalambuan mahunong na ang pagpanghatag ni Gwen Garcia og minilyong salapi sa Kapitolyo ngadto sa mga kalungsuran.
Kini maoy dako kaayong alas ni Garcia pagdani sa mga opisyal sa kalungsuran aron mopaluyo kaniya ug kang One Cebu gubernatorial candidate Pablo John Garcia.
Akong gipaabut nga si Gob. Magpale na usab ang atong makit-ang manabod og salapi ngadto sa mga kalungsuran. Of course, anaa usab sa iyang kiliran si gubernatorial candidate sa LP nga si Junjun Davide.
* * *
Nahadlok ako nga kining nahitabo kang Gwen mao usab ang buhaton sa administrasyon ngadto kang Cebu City Mayor Mike Rama.
Nasayud kita nga adunay daghang mga kaso nga gisang-at ang Bando Osmeña - Pundok Kausawagan (BOPK) batok sa mayor ngadto sa Office of the Ombudsman ug sa DILG.
Ang kinahanglang bantayan sa mayor mao kining kaso nga gisang-at diritso sa DILG. Nasayud baya kita kun si kinsa kini sI DILG Sec. Roxas.
Ako nagtoo nga ang tumong ug tuyo gayud sa BOPK mao nga masuspenso ang mayor aron si Bise Mayor Joy Young na ang mahimong acting mayor. Pinaagi niini ang BOPK na ang magkontrolar sa city hall hangtud sa eleksiyon sunod tuig.
* * *
Daghan kaayong mga Christmas parties karon panahona. Hinaut pang magmatngon kita sa atong kan-on. Hinumdumi usab ang mga tawong labaw nga nagkinahanglan sa inyong hinabang.
Happy birthday to former mayor Tom Garcia nga magsaulog sa kasumaran sa iyang adlaw'ng natawhan karon. Merry Christmas to one and all!
* * *
Email: msr1144@yahoo.com