Bol-anong Santa Claus

Si Serafin Corbo, usa ka Bol-anon nga automotive mechanic didto sa California, mangayo gayud og usa ka buwan nga leave sa iyang gitrabahoan kada panahon sa Pasko (Christmas season) aron motrabaho isip Santa Claus sa duha ka mall sa Los Angeles.

* * *

Professional nga Santa Claus si Serafin. Gradwado siya sa kurso nga Santa Clausing sa usa ka pribadong kolehiyo diin nag-offer og mga short courses kabahin sa Santa Clausing kon mga trabaho diin dunay kalabutan sa ilang gitawag nga Christmas industry.

* * *

Ang Christmas industry gilangkuban niining pipila ka negosyo. Panghimo ug pamaligya og Yuletide decors, Santa outfis, Yule candies, Christmas trees ug mga decoration niini, etc.

* * *

Si Serafin Corbo, 52, nakahuman og kurso nga Santa Clausing ug maayo kini ang iyang palangitan-an kada panahon sa kapaskohan. Suma pa sa iyang ig-agaw nga si Trinidad (lalaki kini) diha sa Tagbilaran City, malampuson si  Serafin sa iyang pagka-Santa Claus tungod sa iyang kadak-on ug sa iyang daku og tingog.

* * *

Kinse ka tuig na nga Santa si Serafin ug duha ka higayon na nga gikontrata siya sa usa ka pamilya nga miyembro sa Saudi royalty. Apan dili sa balay sa royal employer niya siya gipatrabaho kundili sa usa ka dako ug luhong restaurant.

* * *

Tulo ka semana ang iyang trabaho sa maong restaurant ug sa iyang pagbalik sa Amerika gihatagan siya’g bag-ong kotse gawas sa kuwarta nga gibayad kaniya.

* * *

Dunay plano si Serafin nga moabli og Santa Clausing school sa Pilipinas inig-retire na niya sa iyang trabaho isip automotive superintendent didto sa Amerika.

* * *

TRIVIA. Merry Christmas sa atong mga higala ug magbabasa diha sa Kapitolyo, lakip na ang mga personnel sa buhatan sa gobernador. Salamat sa inyong suporta sa Banat News.