Ang hagok

Duna kitay nabasahan, nga naghisgot mahitungod sa tawo nga dili ordinary ang paghagok. Tingali nakasinati nata nga may natulog nga dili sab kita katulog kay haskang sabaa sa hagok sa kadulog panahon nga mangatulog na.

Wala tawoy kalibutan ang tawo nga gikalagutan nato tungod lang sa ka kusog sa hagok.

Busa angay tang masayud kun unsa gayud ang hinungdan niini nga duna may kusog mohagok. Kay tilimad-on kini nga wala sa maayong kondisyon ang kahimsog sa panglawas.

Basin kundi ka magtagad niani, maamgohan na lang nimo nga mao sab diay ang imong kahimtang, may kadaut na sa panglawas mo.

Kay kalagmitan sa kusog mohagok, adunay sinus o sip-on nga di pa hinog o espiso pa ang mucos o plema, nga nakababag sa agianan sa hangin sa ilong.

 Aduna poy laing hinungdan, nga kadtong mahilig sa sigarilyo, mahimong plema ang motapot o mopilit sa tutonlan gumikan sa kadaghan sa kemikal toksin nga anaa sa sigarilyo, nga nakabalda pud sa hangin sa pagginhawa inig katulog.

Sagad sab sa mga tawo nga nanubra ang gidak-on sa lawas o tambok unya dako na ang liog, may purohan nga kusog mohagok kay ang tutonlan kusog na mokurog o mo-vibrate nga momugna og paghagok.

Di sab malikayan kadtong palainom og bino o may alcohol nga ilimnon, 100% kusog sab mohagok.

Tungod niini, mokaon kag mga prutas o citrus sama sa lemon o orange, aron di ka dali sip-onon. Ibalanse o limitahe ang pagkaon sa  tam-is o mantikaon.

Biya-i nang bisyo sa sigarilyo ug pag-inom.

Aron nga malikayan ang kusog nga paghagok, nga maoy tilimad-on nga kun mataligam-an, inanay kini momugna og mas grabe nga kadaut sa kahimsog sa panglawas.

Makaguba sab kini sa sistima sa lawas, nga kun magka sakit lisud na ayohon ug gastoso pa.