Lahi nga beauty pageant

Adunay beauty contest didto sa Brazil diin ang matang niini wa pa makopya sa mga tigpasiugda og tigiay sa kaanyag dinhi sa Pilipinas. Kining tagsulat nagpaabot nga sa dili madugay kopyahon gyud kini dinhi sa ato.

* * *

Ang kaanyag nga gitigiayan dili ang nawong sa nakigsangka sa tigiay kundili ang buttocks kon sampot o lubot niini. Sa Iningles derriere ang tawag niini. Sa Brazilian, bumbum.

* * *

Ang babayeng mananaug sa maong kontes hatagan sa taytol nga Miss Brazilian Bumbum. Sa Iningles Miss Derriere. Sa Binisaya, Gining Sampot.

* * *

Ang mananaug karong tuiga mao ang 25-anyos nga si Carine Felizardo kinsa nakadawat og ganti nga 5,000 reais kon US$2,500. Nalipay kuno siya nga ang iyang bumbum kon sampot nakahatag kaniya og kadungganan.

* * *

Naay midayeg sa organizer niining matang sa beauty contest kay kuno mihatag kini og pasidungog sa parte sa lawas sa babaye nga sa tinuod lang mas makadani og atensyon kay sa nawong sa babaye.

* * *

“The 2012 Miss Brazilian Bumbum attracted attention worldwide,” matud pa sa usa ka Brazilian newspaper. Gikoberan kini sa daghang media reporters gikan sa nagkalain-laing nasud sa kalibutan.

* * *

TRIVIA. Advance Christmas greetings sa atong mga magbabasa sa Ormoc City lakip na ang atong mga newsdealers ug newsboys diha. Daghang salamat sa nagpadayon ninyong suporta sa Banat News.