Di na sama kakahadlokan ang bagyong si Pablo. Human ihulagway nga laing Sendong kun mosimang sa Mindanao, o laing Ruping kun molahos sa Sugbo, giangkon sa Pagasa nga si Sendong di na maisip nga super typhoon. Ug ang bawon niyang uwan di diay ingon ana kadaghan.
Nagsugod og hinay si Pablo sa iyang paglatas sa lapad nga Philippine Sea. Kansang katugnaw nakaiban og kapin sa 80 ka kilometro matag takna sa iyang haguros. Naibanan pa gyud ang puwersa ni Pablo og laing 25 ka kilometro matag takna dihang nibangga sa kabukiran sa Surigao ug amihanang Mindanao sa wa pa mopaingon dinhi sa Central Visayas.
* * *
Samtang nihinay ang hangin ni Pablo, nagkakusog ang iyang pag-irog. Nasukod sa Pagasa nga 24 ka kilometro matag takna ang iyang pag-irog paingon sa kasadpan. Sa usa gani ka bahin sa iyang pagsud sa teritoryo sa Pilipinas, niirog siya sa gikusgon nga 30 ka kilometro matag takna.
Maayo ning balita, segun ni Pagasa Mactan Director Oscar Tabada. Kay nagpasabot nga di ingon ana kadaghan ang uwan nga mabubo ni Pablo sa mga dapit nga iyang maagian. Apil sa makapahimus ini mao ang Sugbo. Nga gitakdang kusukusuon ni Pablo sud lang sa pipila ka gutlo, di abtan og oras.
* * *
Labing maayong balita mao nga ang Sugbo mahimong makaikyas sa labing bangis nga santako ni Pablo. Kansang kapaspas nakapausab sa orihinal nga banabana sa pagkaigo sa Sugbo. Human ta pasidan-i niadtong Domingo nga moabot ang bagyo sa tungang gabii karong Miyerkules, giusab ang pangagpas pagka Lunes nga motugpa na si Pablo karong Martes sa gabii.
Pagsuwat nako ini, nausab nang ruta. Inay modiretso sa Sugbo gikan sa Surigao del Sur, gitakda nang moagi si Pablo sa Agusan del Sur, Misamis Oriental ug Cagayan de Oro City, sa di pa moagi duol sa Dumaguete City sa Negros Oriental, di na sa tungatungang Sugbo. Ang bahin sa Sugbo nga gitakdang makulatahan ni Pablo mao ang isla sa Camotes.
* * *
Bisan sa paghinay sa hangin, pagkatibuwaag sa uwan ug pagsimang sa direksiyon ni Pablo, di angay’ng molugak ang mga Sugbuanon ug ubang mga molupyo sa Kabisay-an sa ilang pangandam. Mouyon ko sa paniid nga way pangandam nga sobra ra.
Di hinuon ta angay’ng mainutil tungod sa kahadlok sa bagyo. Di makiangayon nga tungod lang sa hulga ni Pablo suspensuhon dayon ang klase ug gakotan dayon ang tanang barko bisan wa pa maisa ang tukma nga public storm warning signals. Gawas lang kun mokumpisal ang gobyerno nga napakyas (1) pagtarung sa drainage system maong mobaha bisan hinay rang uwan ug (2) pagsusi sa mga barko maong mangalunod bisan gagmay rang bawod.
* * *
Email: leo_lastimosa@abs-cbn.com