a. Ang sukaranan sa pag-ebanghelyo mao gyud ang pagkakabig kun metanoia38 sa usa ka tawo. Mahinungdanon kaayo ang panginlabot sa masigkahabig aron makab-ot ang bunga nga mao ang kaluwasan. Si San Agustin nagkanayon: “Tawo gibuhat ka sa Dios gikan sa wala apan dili ka maluwas kun wala pud ikaw!”
b. Nabag-ong Katekesis.39 Dili ikalimod nga daghan kanato gihapon bisan karong mga panahona ang nahimong mga salingkapaw diha sa atong pagsabot sa atong pagtuo. Ang atong pagtuo nahimong patuotuo gumikan sa hinungdan nga nakalimtan ang rasyonal nga bahin niini. Ang pagtuo nga walay rason mamahimong moresulta sa patuo-tuo o superstition. Ang nabag-ong katekesis ang nipahimug-at sa hustong pagpanudlo (Orthodoxy) nga mobunga og hustong pagbansay (Orthopraxis). Ang nabag-ong katekesis mao ang mahinungdanong elemento sa usa ka nabag-ong pag-ebanghilyo.
c. Nakasentro kang Kristo40. Si Kristo pabiling buhi ug kanunay’ng mahinungdanon kagahapon, karon ug sa umaabot. Mao nga ang tanan nagaliyok nganha kaniya. Ang atong pagpasidungog sa mga Santos ug sa Mahal nga Birhen Maria pagahimoon ingon nga mga kabahin sa kang Kristong pag-antos, kamatayon ug Pagkabanhaw.
d. Nagasukad sa balaang kasulatan41. Walay makahulip sa gahum ug bili sa Pulong sa Dios. Ang bibliya mao gayud ang pinakamahinungdanong basahon sa katekesis. Kay sa higayon nga basahon ang nasulat sa Bibliya ug tun-an kini, sama ra nga ang Dios mismo maoy nakigkukabildo kanato.