Hulga ni San Pedro Calungsod

SRP, Cebu City—Kay human na man ang National Thanksgiving Mass ni San Pedro Calungsod inig basa nimo ini, ikatug-an na nako ang labing dakong kahadlok sa kapolisan ug sa militar sa ilang pagbantay sa kalihokan nga gitambongan nilang Presidente Noynoy Aquino ug sa mga prinsipe sa Simbahang Katoliko ug sa bagang duot sa mga deboto.

Nahadlok sila nga kabay-an sa mga terorista ang misa nga, tungod sa kalambigitan sa usa sa labing gamhanang relihiyosong kahugpongan, may kalibotanong implikasyon. Duha ka dapit ang ilang gitutokan nga mahimong tinubdan sa hulga: Ang Pasil ug kasilinganang mga barangay sa Suba ug Ermita; ug ang Alaska, Mambaling nga maoy pinuy-anan sa mga Badjao.

* * *

Human gipahibawo sa kahadlok sa intelligence community, si DILG Secretary Mar Roxas mabinantayon nga nipasidaan sa publiko. Di mahimong paukyabon ang publiko ug lawgawon ang tibuok kalihokan pinaagi sa pagbutyag sa hulga sa terorismo, apan kinahanglan sab siyang mopasidaan sa mga pundok nga utok-pulbora. Nidangop si Roxas sa termino nga “posibleng sabotahe” aron pagpahibawo sa tanang hingtungdan nga andam ang gobyerno sa bisan unsang mga panghitabo.

Mao ni hinungdan nga gikumbinser sa militar ug kapolisan si Bise Presidente Jejomar Binay sa di paghinayon sa iyang plano pagtambong sa misa uban ni Presidente Aquino. Kay di maayo ang implikasyon sa seguridad kun magkauban sa kalihokan nga sama ini kapeligro ang duha ka labing dagkong opisyal sa nasud.

* * *

Gidudahan ang Pasil ug kasilinganang mga barangay kay pulos daplin sa dagat. Bisan sa pasalig sa Philippine Coast Guard, gidudahan nga wa hingpit mabantayi ang ilang mga pantalan gikan sa mga kontrabando—gikan sa pinabuthang mga isda ngadto sa ilegal nga drugas. Di layo ang kahigayonan nga sayon nga nakalusot ang mga armas ug mga eksplosibo.

Nakaginhawa hinuon og luag ang militar ug kapolisan. Way direktang agianan ang Pasil paingon dinhi. Maong giselyohan ang kadagatan sa SRP. Ug gihatagan espesyal nga atensiyon ang ilang mga molupyo nga nanud sa South Coastal Road.

* * *

Mas nahadlok ang militar ug kapolisan sa mga Badjao. Kansang mga pinuy-anan pila ra ka metro gikan sa Templete de San Pedro. Ang di malikayan nga pagtandi sa ilang kakabos ug sa kaabunda sa nasudnong misa pasalamat, sa mga mata sa intelligence operatives, nakahimo sa Alaska nga hinog ug haom nga sukaranan sa terorismo.

Apan wa igdungog ang mga Badjao nga terorista. Ni sa paghupot og kusganong politikanhong mga sentimento. Wa say sukaranan nga masilag sa pagpasidungog sa batan-ong Santo. Gawas pa, wa sila pasagdi sa gobyerno ug pribadong sektor. Gawas nga gitukoran og mas disenteng mga pinuy-anan, gipalambo sang ilang mga panginabuhi. Kun way nahitabo sa imong pagbasa ini, ang kadagkoan sa kapolisan ug militar maoy labing tam-is og pahiyom.

 Email: [email protected]