Ning bag-ohay lang gitugotan sa United Nations ang Palestine nga makabaton og observer status isip usa ka nasyon human sa 65 ka tuig nga pagpaabot. Nagpasabot kini nga mapaminaw na ang mga inagulo, reklamo, ug panginahanglan sa mga Palestino diha sa organisasyon sa mga kanasuran.
Sa botohan sa 193 ka mga miyembrong nasud, 138 niini ang mipabor nga mahatagan og observer status ang Palestinians, siyam ang dili pabor nga naglakip sa Estados Unidos ug Israel nga maoy higpit nga kaaway sa mga Palestino. Ang 41 ang mi-abstain.
Daan nang di makapaabot og botos gikan sa maong duha ka nasud ang mga Palestinians tungod kay magkaalyado ang US ug Israel.
Kahinumdoman nga niadtong 1947 ang UN General Assembly nagbotasyon aron bahinon ang Palestine kaduha, ang usa alang sa mga Hudiyo nga mao ang mga Israelis ug ang katunga sa mga Arabo, mao kini ang sinugdanan sa panagbingkil sa duha ka mga nasyon. Bugtong ang Israel lang ang nahimong usa ka estado samtang ang mga Palestino wala ilha sa UN isip usa ka nasyon, kini tungod gihapon sa pagsupak sa mga Palestino sa pagbuak sa ilang teritoryo.
Ang pagkatukod sa Israel gibase sa Bibliya kay matud pa namalik ra sila sa yutang gisaad kanila sa Diyos. Mibalik sila og puyo sa maong teritoryo human sa ikaduhang kalibotanong gubat diin sila maoy gilutos og maayo sa mga German Nazis ug niadtong 1946 nagsugod sila og puyo sa karaang Israel apan tensyonado sa ilang mga silingang Arabo nga mao nay namuyo sa lugar.
Tungod niini mipatunga ang UN ug nabahin ang teritoryo. Apan sa pagkakaron ang West Bank, sidlakang bahin sa Jerusalem nga agianan padulong sa bag-ohay lang nagiyera nga dapit nga mao ang Gaza Strip, gikontrolar pa gihapon sa Israel.
Makatarunganon lang nga ilhon sa UN Assembly ang mga Palestino tungod kay sila usa usab ka nasyon nga karon daw nawad-an na og identity ug mas naila sa kalibotan isip mga militante, terorista ug extremist tungod sa mga binuhatan kaniadto sa Palestinian Liberation Organization ni anhing Yasser Arafat, Hamas militants ug uban pang jihadist nga grupong supak sa Israel.
Tungod sa bag-ong status sa Palestinians sa UN ug sa kadaghan sa mga nibotar pabor niini dako ang kasigurohang makab-ot na sa mga Palestino nga maestablisar ang usa ka state diha sa mga teritoryong gikuptan sa Israel sukad pa sa 1967 nga giyera.
Ang gihimo sa UN usa ka senyales nga ang US dili na makadiktar sama kaniadto sa mga kaubang nasud. Sa habig sa Pilipinas nga mibotar pabor niini, usa kini ka pagpaila ngadto sa mga Muslim nga ang gobiyerno nato walay pili kung ang kaayohan sa kadaghanan maoy hisgutan.
Timailhan niini mao ang nakab-ot nga sabot-kalinaw tali sa mga rebeldeng Moro Islamic Liberation Front sa Mindanao ning bag-ohay lang.