Hapsaya dayon palihug

Pagkanindot kun panangtangon na sa Visayan Electric Company (VECO) ang mga karaan nila nga poste diha daplin sa atong mga karsada. Sa ingon nga paagi makahapsay kini sa atong aseras ug masayon na ang pag-agi sa mga tawo.

Unsaon  man gud, samtang wala na kini gamita sa VECO ang maong mga poste kay nagbutang na man sila og tag-as nga poste nga gihimo sa maayong kalidad sa semento, apan dili pa nila makuha ang mga karaan nga poste kay padayon kining gigamit sa mga telecommunications company nga walay kaugalingon nga poste.

Kagahapon sa buntag, samtang didto ko atubangan sa Lahug Elementary School maoy napunting sa akong panan-aw ang naglambud-lambod nga mga alambre ibabaw sa poste nga nagsagol ang alambre sa koryente ug sa mga telepono.

Grabeha uy. “Queen City of the South” unya ingon niini ang talan-awon? Ang maayo tingali sa mga telecommunications companies mao nga makig-alayon sila sa VECO aron balhinon na usab ang ilang koneksyon didto sa mga bag-ong poste sa VECO.

Malipay unta kita kun dalion kini sa VECO ang ilang proyekto sa pagpanangtang   gikan sa karaan nga mga poste.

* * *

Kinsa kaha sa mga kapitan o kaha konsehal sa barangay dinhi sa dakbayan nga gipagamit og sakyanan sa City Hall nga dunay anak nga anaa nagtrabaho sa Visayas Community Hospital?

Ambot, usa ba kaha kini ka doktor o nurse kay ang akong kauban nga si Fred Languido wala makaklaro kay abtik kaayo nga nanaug ug misulod dayon sa ospital. Gihimo man gud nga service vehicle niya ang sakyanan nga giisyu sa City Hall.

Swerte lang kay wala ma-take note ni Fred ang plate number sa maong sakyanan. Awhag lang nako sa maong opisyal sa barangay nga ayaw tawon ipagamit ang maong sakyanan isip service vehicle sa imong anak.

Unya, nalipay na lang ko kay pulos-pulos na sa mga sakyanan sa City Hall adunay marka nga FOR OFFICIAL USE ONLY ug ang uban logo sa City Hall, gawas nga nagdala kini og “red plate.”

Dili ko mauwaw nga moangkon nga lain nako kini nga kalampusan kay ang kamandoan ni Mayor Michael Rama nga butangan g’yud og marka nga FOR OFFICIAL USE ONLY ang mga sakyanan sa City Hall, apil na kadtong gihatag sa mga barangay, gihimo tungod sa akong lindog nga gisuwat sa The Freeman.

Awhagon nako ang katawhan nga kun duna mo’y makita nga mga sakyanan nga “red plate” unya walay marka nga FOR OFFICIAL USE ONLY, tug-ani ko kay aron makorehean.

Wala ko’y laing tumong niini gawas sa pagtul-id sa hiwi.