Black propaganda, below the belt!

Layo pa ang eleksyon. Wala pa ang official nga campaign period. Apan, sige na ang kampanya, sige na ang linabayay og lapok. Sige na ang mga campaign sorties, apan dili nila nganlan og pangampanya … suroy-suroy lang , pulong-pulong lang, dialogue lang, consultation lang, lamanohay lang, pikpikay lang sa abaga, pangumustahay lang … dili gyud kampanya kaylagi, wala pay campaign period.

Mao ni ang politika sa atong nasud. Mopatawag og tigum o seminar ang senior citizens, ang labing daku nga sector sa tibuok nasud, unya, mokalit lag tunga ang mga politiko … mosulti, apan dili konohay mangampanya. Resource person lang. Only in the Philippines.

Unya, sa media, labi na sa radyo, regular na gyud nga pangampanya ang imong madunggan … “kawatan, way uwaw, baga og nawong, palahubog, tikasan, himabaye” … unsa pa na diha.

Mao nga kun ikaw ang maigo, sakit kaayo. Apan, tungod lagi kay politika, ipalapus  na lang nimo sa pikas dunggan ang imong mandunggan. In Philippine politics, anything goes. Igo ka na lang sa pagsiyagit nga: Black propaganda. Below the belt.

Unsa na kaha no inig-sugod gyud sa campaign period?

On the other hand, kun dunay unod, ug kun dunay pagkatinuod ang gitawag nga black propaganda … masakitan gyud ka.  Waa na kay mahimo ini. Igo kana lang sa pagpanghimakak. Sa ato pa, kun limpiyo ka, kun walay mansa ang imong pagpangagamhanan paghupot sa public office … waa kay angay kabalak-an.

On the contrary, kun naduhig sa kahugawan ang imong pagpamunoan, bisan kaha exemplary ang imong performance, yam-iran kini sa katawhan … ug dili sila mahupay pinaagi sa pagpang-apod-apod og mga mehoras ug pagpanglabay og salapi ngadto kanila.

Anyway, gumikan sa media, ang ka-advance na sa communication, ang katawhan, bisan sa kahilitang suok sa dakbayan, kalungsoran ug kabaranggayan,  well-informed na. Sayud na sila sa imong mga binuhatan sulod sa pila ka tuig nimong pagpamunoan.

Ug particular na kaayo ang lungsod sa isyo sa corruption. Sayud sila nga ang dakung hinungdan nganong wala gayud mouswag kining atong nasud, mao ang corruption. Pangilkil  dinhi, pangilkil didto … unsaon nato pag-uswag ini? Maoy hinungdan nga mahirap ang ating bansa. Sila ray nangadato. 

Sa ubang kanasuran, maduhig lag gamay nga isyo sa corruption ang usa ka public figure, mo-resign dayon. Ang uban maghikog gyud.  Apan, dinhi sa ato, pugong gyud tamas ginhawa, manggunit og maayo sa gilingkoran aron dili mapalagpot gikan sa katungdanan. Only in the Philippines.

Karon, gihatagan na usab kita’g laing higayon paglimpiyo sa atong pangagamhanan. Ayaw usiki kining maong higayon. This time, ayaw palingla sa salapi. Ayaw padala sa matam-is nilang mga pulong. Sa laktud, ayaw ibaligya ang imong katungod ug obligasyon pagpili. Sagrado kini. Sa ato pa, makagaba.

Tingalig magabaan na sad ta!