Ikaduhang hilisgutan

b. Pagtuo sa Diosnong Pag-amoma22 Sanglit ang Dios nga atong Amahan ang nasayud nang daan sa atong mga pangayo bisan wala pa nato sila malitok. Si Obispo Teofilo kasagaran ang moingon: “Sige lang” diin matud pa, sa dihang nahutdan sa pagkaon sa kumbento kay lagi, ipanghatag ra man niya ang bisan unsa nga anaa niya makwarta man o bisan gani ang kaugalingon niyang singsing o sapatos. Si Obispo Teofilo ang madunggan lamang nga moingon; Sige lang, ayaw kabalaka. Sa tingkaon na, niabot ang ilang silingan nga nagdala og pagkaon.23 Ug si Sr. Esterlita Lauros ang mipaambit nga gisugo gihapon ni Obispo Teofilo ang iyang drayber nga padaganon ang sakyanan bisan hapit na mahurot ang gasolina. Nahutdan kini tungod gyud sa gasolinahan sa higala sa Obispo nga mipuno niini og gasolina uban pa gyud ang paghatag og kwarta.24 Mga ginagmay ug mga yanong panghitabo sa kinabuhi sa tawo nga maisip natong panalangin sa Diosnong Pag-Amoma.

c. Makanunayon diha sa Pag-ampo diin ang tawo ang dili gyud mawad-an og pailob diha sa makanunayong pagsangpit sa Dios adlaw ug gabii. Matang sa pag-ampo nga walay pagkutat. Atong pamalandongan kining usa ka sugilanon:

Ang gatusa’g-usa ka tuktok

Sa usa ka lungsod nahimutang ang usa ka mansiyon nga dunay dako kaayo nga ganghaan. Usa ka tiguwang adunahan ang nagpuyo niini apan ang maong babaye nabantog nga walay gawas-gawas. Mao nga natingob ang pagtuo sa mga molupyo nga usa ka dautan, arogante, ug hakog ang maong babaye. Mao nga walay ni bisan kinsa nga nangahas nga moduol aron mangayo og panabang. Apan usa ka adlaw niana, nahiabot ang usa ka inahan nga dunay dakong panginahanglan kay lagi nasakit ang iyang anak. Walay si bisan kinsa nga makatabang kaniya sanglit kay naglisud ug kabus man sab ang mga tawo. Mao nga nangahas siya og adto sa maong mansiyon taliwala sa mga pagsupak ug mga pagbadlong. “Moputi pay uwak day, wala gyud kay makuha.” Matud sa usa ka hamtong lalaki. Apan nangarasti gyud ang maong babaye. Ug tuod man human ang tunga sa adlaw nga pagpamasin, nahibalik ang maong babaye nga namungingi sa iyang mga gidalang bugas, prutas, salapi ug  tambal. Butang gikahibulong sa mga molupyo. Usa ka biyuda nangutana sa babaye kun nganong nakadala man siya. Usa kini ka milagro matud sa usa ka bayong-bayong. Mitubag ang babaye: “Hapit na gyud unta ko mawad-i sa paglaom. Apan human sa akong gatusan ka tuktok, namasin pa gyud ko og lain pang usa ug diha-diha nigawas ang usa ka hamtong babaye nga mapahiyumon. Maglisud diay siya og dungog mao nga nadugay siya og abli.”

3. Ang pagkaplag sa kinabuhing maampoon

Si Andrew Knowles25 ang nitanyag kanato og mga mahinungdanong lakang diha sa pag-ampo.

a. Diha sa pag-ampo atong mapalgan ang Dios. Kun giisip nato siyang suod nga higala, angay ug matarung lamang nga mogahin kita og mabulokong panahon uban Kaniya diha sa pag-amo.

b. Diha sa pag-ampo atong mapalgan ang kinabuhing maampoon ni Jesu-Kristo-Ang Kinabuhi ni Jesus usa ka pag-ampo. Pagasugdan niya ug tapuson ang iyang mga buhat pinaagi sa pag-ampo. Moadto siya sa mamingaw’ng dapit aron siya makighinabi sa iyang Amahan. (Sumpayan pa)