Kuwarta ba gihapoy modaog?

Gikahadlokan nga magbaha ang kuwarta sa eleksiyon sunod tuig. Politikanhong pundok dinhi sa Sugbo gituohan nga may hangtod P400 milyones nga pundo nga andam nga isabod ngadto sa mga botante. Gipaningot na og bugnaw ang ilang mga kaatbang nga nabalaka nga, sama sa naandan, magpapalit na sab ang mga botante.

Mga alyado ni Presidente Noynoy Aquino nagbagulbol nga wa pa gyo’y kuwarta nga gipagawas ang administrasyon hangtod karon. Igo lang silang giingnan nga way plano ang administrasyon nga mamalit og boto. Busa mahimo ba nga hingusgan ang edukasyon sa mga botante?

* * *

Kun moinsistir si Presidente Aquino pagputol sa naandang bisyo sa nangaging mga pamunoan pagpabaha og kuwarta sa piniliay, kumbinsido ang iyang mga piliunon nga mangamote sila. Maong, lahi sa nangaging mga piniliay, ang oposisyon maoy mas abunda og kuwarta ug ang taga administrasyon maoy nagmingaw. Di lang dinhi sa Sugbo kun dili hasta sab ubang bahin sa nasud.

Ang nangaluya nga mga alyado ni Aquino klarong wa katugkad sa dakong kausaban nga nahitabo sa nasud sukad nausab ang liderato sa Malakanyang niadtong 2010. Ang higanteng kausaban nga nakapadaog ni Aquino maoy motino nga di na magpadayon ang nangalisbong mga piniliay nga ang labing daghan og bulawan o ang labing dagko og armas maoy manghawod.

* * *

Kun mosugot si Aquino nga gamiton ang buhis sa katawhan aron pagpadaog sa iyang mga alyado sa eleksiyon sa Mayo sunod tuig, unsa may iyang kalainan sa kurakot nga mga pangu nga iyang gisundan? Kun himuon ang tanan aron mangharos ang iyang partido, unsa may mahitabo sa iyang kampanya pagtino nga ang buhis sa katawhan maggamit lang alang sa kaayuhan sa katawhan, di sa personal ni politikanhong katuyoan.

Maong, inay kuwestiyunon, angay’ng hangpon sa tanang hingtungdan ang awhag ni Aquino sa iyang mga alyado sa paglusad og kampanya nga pinasikad sa mga isyu ug plataporma, di sa kuwarta.

* * *

Andam na bang katawhan sa bag-ong politika? May katakos na bang mga botante pagsalikway sa suburno sa kurakot nga mga politiko? Mangahas ko pag-ingon nga andam na sila. Gawas lang kun nagpuyo sila sa labing hilit nga mga langob nga wa maabot sa lab-as nga hangin sa kaligdong sa panggobyerno.

Wa hinuoy garantiya nga wa nay mamalit ug manghudlat sa mga botante. Si Presidente Aquino ang gitahasan sa pagpatuman sa mga lagda sa piniliay batok sa pagpanuburno ug terorismo. Di paigo ang pag-awhag sa iyang kaubanan pagpatigbabaw sa gawasnong kabubut-on sa katawhan. Kinahanglan nga barawon sab niya ang kalapasan sa ilang mga kaatbang. Kay kun mangiyugpos lang atubangan sa nagpatuyang nga mga trapo, sama rang gilawog ni Aquino sa tirong ang iyang mga alyado.

* * *

Email: [email protected]