Nalipay ko nga ang kagamhanan sa dakbayan sa Mandaue misugod na sa pagpangguba sa kabalayan nga gitukod sa daplin sa Mahiga Creek. Ang tinuod malooy g’yud kita sa mga hingtungdan, apan ang kaayohan sa kadaghanan maoy atong gilantaw.
Ang pagpuyo gud nila sa daplin sa kasapaan makapagamay sa sapa kay ang uban kanila mobutang man og riprap aron molapad ang ilang lugar, apan wala nila huna-hunaa nga ang ilang gihimo makapagamay sa sapa.
Abi ninyo og ngano? Ang mga nagpuyo sa pikas tampi sa sapa mohimo’g riprap, ug ingon usab niini ang gihimo sa nagpuyo sa atbang nga tampi. Mao kini nga migamay ang gilapdon sa sapa.
Kun dunay uwan, ang kusug nga bul-og sa tubig mosuyla sa sapa ug makamugna kini og lunop nga apektado sa maong binuang ang daghang kabalayan.
Mao kini ang rason nga samtang maluoy unta kita niining mga tawo nga maapektahan sa demolisyon, mas mopasuwabi ang kalooy nato sa mas daghang tawo nga mag-antos kun maglunop tungod sa binuang sa ubang nagpuyo sa daplin sa sapa.
Apan si Mayor Michael Rama wala pa makatuman sa iyang gibutyag nga panggub-on niya ang kabalayan nga maoy nakapagamay sa Lahing-Lahing Creek diha sa Barangay Mabolo.
Mao kana ang rason nga kay migamay man ang kaniadto lapad nga Lahing-Lahing Creek nga gikan sa Ayala, malunopan ang maong dapit kun dunay kusug nga uwan.
Nakabantay hinoon ko ni Mayor Rama nga mipaguba sa kabalayan sa mga squatters nga gitukod sa yuta sa dakbayan diha sa North Reclamation Area.
Kun iya kini nga himoon sa kabalayan nga anaa daplin sa mga sapa, makaingon ko nga walay kahadlok si Rama nga mapilde basta mapatuman lang ang “tul-id nga pamaagi.”
Fight mayor!
* * *
Sayoha sa Globe nangimbitar og Christmas Party sa mga piniling sakop sa media uy. Himoon na kini karong gabii. Apan nakasabut ko nga alang ra kini sa dunay imbitasyon.
Salamat sa imbitasyon nga akong nadawat! Buyno, kadtong walay mga imbitasyon mas maayo nga dili lang moadto kay mabarato ta. Swerte lang ko nga naapil sa imbitasyon.
Daghang party sa Globe sa milabay’ng katuigan wala ko’y imbitasyon ug wala ‘sab g’yud ko motambong. Usahay gani dili man ko makatambong sa party bisan og duna ko’y imbitasyon.
Nakabantay man gud ko nga dunay akong mga kauban nga bisan wala imbitaha sa mga party mopugos g’yud pag-adto, unya ang uban maghimo pa og makauuwaw nga kalihukan.
Dunay uban nga magdala pa og laing kauban. Nahinumdom mo adtong babaye nga sa grabeng kahubog, miyaka na lang sa pansayan sa usa ka hotel sa dalan Ramos?