Law-ay’ng hulagway sa mga bus ug PUJ

Nganong sa kada pangita sa mga polis kang Joavan Fernandez dali ra man kaayo kining mahanaw unya lisod makit-an?

Usa ra gihapon ang tubag niini: Tungod sa pagka-konsentedor sa iyang amahan nga si Mayor Socrates Fernandez sa iyang mga dautan nga buhat ngadto sa publiko.

Kining ako panghinaot lang ngadto sa kapolisan nga ning panahona, madakpan na si Joavan aron ipatubag ang mga kadaot nga iyang nahimo ngadto sa publiko.

Kay kun wala gihapoy mahimo ang kapolisan, motuo na ko nga dili lang si Brod Soc ang nag-konsente sa mga buhat ni Joavan. Motuo na ko sa mga estorya nga adunay dakong politiko nga molakip og tapion aron dili molihok batok sa sinagop sa mayor.

Sukad pa kaniadto nga lakip ang kadagkoan sa kapolisan sa probinsiya magsige lang og saad nga dakpon nila si Joavan kun makasala pag-usab.

Namusil na usab si Joavan sa usa ka gasoline station sa Talisay.

Kun gituman pa sa kapolisan ang ilang saad kaniadto, wala na seguro mahitabo kanang kagubot sa gasoline station diin ang sinagop sa mayor namusil ngadto sa mga pumpboy kay nanagan kay nahadlok kaniya.

Karon nga molinawlinaw na usab kining kasoha, malubong na usab sa kalimot ang mga dautang buhat ni Joavan.

Busa kun dili siya madakpan sa kapolisan karon, magpaabot na lang ang publiko og lain pang balita sa dautang buhat ni Joavan.

* * *

Si Bokal Sun Shimura sa ika-upat nga distrito sa lalawigan sa Sugbo misang-at og resolusyon nga nag-awhag sa Land Tranportation Franchising and Regulatory Board sa pag-ban sa mga law-ay nga hulagway ug sulat sa mga public utility vehicles.

Sa tanang mga bokal, kini pang usa ka batan-on ang nakakita niining maong mga talan-awon sa mga bus ug PUJ sa Sugbo.

Tinuod gyud. Puwerteng kapangabastos sa mga hulagway sa mga bus ug PUJ.

Unya, aduna pa gyuy mga sulat nga bastos basahon.

Kining tanan makita ug mabasa sa mga bata, pero ang mga bus ug PUJ dayag kaayong nagbuhat niini.

Maayong aksiyonan sa LTFRB kining resolusyon ni Shimura pinaagi sa pag-isyu og administrative circular ngadto sa mga pampublikong sakyanan nga hunongon na ang pagpamutang og law-ay nga mga hulagway ug sulat. Ug sa mga gipamilit, tangtangon gyud sa mga operators.

Ang nindot ipadayon kanang pagpapilit og hulagway nga relihiyoso ug mga berso sa Bibliya.