Nakabantay sab tingali mo nga atol sa mga rali-rali batok sa gobyerno naa gyuy mga raliyesta kun mga aktibista nga magmaskara o ba kaha motaptap sa ilang nawong og panyo o tualya.
* * *
Ang ilang tuyo sa pagtaptap sa ilang nawong aron dili sila mailhan sa kapolisan. No, dili tungod kay bati sila’g nawong ug mauwaw maigo sa tv camera.
* * *
Didto sa Canada ang Canadian Parliament mipasar dili pa lang dugay og balaud diin gidili ang pagmaskara o pagtaptap sa nawong sa publikong lugar bisan wala’y rali nga giapilan.
* * *
Ang katuyuan sa maong balaud mao ang pagpitol sa mga kalihukan sa mga badlungong sakop sa katilingban sama sa mga bandal, terorista ug bisan ordinaryong raliyesta, etc.
* * *
Matud pa sa mga miisponsor sa maong balaud sa Parliament usa sa nag-unang target sa maong balaud mao ang Black Bloc Anarchist Group kang kansang mga sakop mitabon sa ilang nawong og lagpad nga panapton ug hood samtang sila nagsuroy-suroy sa kadalanan ug ubang pampublikong lugar.
* * *
Suma pa ni Parliamentarian Blake Richards, kinsa maoy prinsipal nga isponsor sa balaud, gihangop sa katawhan ang maong balaud gumikan sa nagkalapad nga hulga sa ilang komunidad.
* * *
TRIVIA. Daghang salamat sa nagpadayong suporta sa Banat News sa atong mga magbabasa diha sa Labangon Riverside ug sa A. Lopez.