Pahimangno sa Pasko

Pwerteng paspasa na gyud sa dagan sa panahon. Gani bag-o lang kita nagpakli  sa atong kalendaryo karon human na ang pagtimaan sa mga adlaw sa mga santos ug sa mga kalag nga hapsay ra gyud intawon ug walay mga dagkong kakulian ang mitumaw.

Karong human na ang kalagkalag  taliabot na gyud ang Pasko. Dili na gyud nato mapugngan ang pag-abot sa maong espesyal ug labing mabulokong adlaw sa tuig.

Nagpasabot nga daghan na usab mga adornong pang-Pasko sama sa makita karon sa mga malls ug dagkong establisamento ug ang pabarugon nang Giant Christmas Tree sa Fuente Osmeña circle

Ang BFP nagsugod na usab sa kampanya bahin sa fire safety tips aron mamahimong luwas kita sa pagsaulog sa Pasko.

1. Ayaw kamo pagpataka og palit og mga series lights kay mao kini ang kasagarang hinungdan sa sunog sa panahon sa Pasko. Peligro ang baratuhon kay di kini maayo og kalidad.

2. Kinahanglan switch-off ang tanang electrically lighted Christmas decors sama sa series lights, lanterns ug uban pa nga mga dayandayan nga dikorente kun dunay lakwon o mangatulog.

3. Kun layo ang lakwon o mobakasyon pagnga ang plangka ug isirado usab ang LPG tank valve.

4. Magpaboto lang sa hawan nga lugar ug kinahanglang dunay hamtong nga mag-supervise sa mga bata, ayaw guniti. O ba kaha alternatibong pagsabasaba na lang ug dili na pabuto.

5. Ilisi nang daan ang karaang electrical wirings sa panimalay.

Angayang itanom sa alimpatakan kini nga mga tips kay kini giya nato aron luwas gikan sa sunog ug disgrasya.

Ang tiunay nga pagsaulog sa Pasko wala mag-agad sa unsa  kadaghan sa imong dayandayan  sa inyong panimalay. Ang labing mas mahinungdanon mao nga magmaya kita uban sa atong kabanay sa maong panahon.