Daghan nang mga milagro nga gi-attribute kun gipahinungod kang San Pedro Calungsod. Usa sa labing una niini mao ang pagpanaghiusa sa mga Sugbuanon atol sa mga kalihukan kalabot sa iyang kanonisasyon.
* * *
Didto sa amo pananglitan dihay mga managsilingan nga taud-taod nang wa magtingganay apan nagbinatiay adtong adlaw sa kanonisyon. Nagbinayloay sila’g hunahuna kabahin sa pagkasanto ni San Pedro.
* * *
Diha say usa ka born-again Christian nga nanglabay sa mga rebolto sa nagkadaiyang santos sa ilang family altar human gub-a kining maong altar apan sa adlaw sa kanonisasyon nagpunay og tan-aw sa tv coverage sa nanghitabo didto sa Roma.
* * *
Unya kining maong born-again nangita ron og rebolto ni San Pedro Calungsod. Ug samtang wala pa ang rebolto gipapilit sa ilang bongbong ang page one sa The Freeman diin napatik ang hulagway ni San Pedro. Dili ba ni usa ka milagro?
* * *
Sa laing bahin, angay na unta nga hatagan og makusog nga pagduso ang pagpabiyatikar kang Monsenyor Teofilo Camomot kinsa mipakita og timailhan kon ilhanan sa usa ka santo. Si Monsenyor Camomot namatay pipila na ka tuig nga milabay ug diha sa Carcar gilubong.
* * *
Daghan ang nakasaksi sa mga timailhan niyang kinaiya nga santoson.
* * *
TRIVIA. Maayong adlaw sa atong mga higala diha sa Carcar ug kasilinganang mga lungsod diin ubay-ubay ang mga magbabasa og Banat News. Daghang salamat sa inyong suporta.