Tulay dili koral

Adunay duha ka managsuon nga pulos dunay kayutaan. Sa sinugdanan, nindot ang ilang relasyon. Hapsay, makidaiton, ug mahigugmaon. Kanunay silang magtinabangay sa usag-usa. Kanunay nilang gitan-aw ang mga panginahanglan nila ug sa ilang banay. Takulahaw lang nagbangi ang managsuon. Nagsugod kini sa gamay nga hinungdan. Nilipang ang maong panagbangi nga ni-resulta og away, panagsukliay og mga dautang pulong hangtud na sa pagbinungolay.

Usa ka adlaw dunay panday nga mituktok sa pultahan sa maguwang: "Sir, basin duna kay angay ipabuhat dinhi sa imong panimalay sa usa ka panday nga sama nako" pangutana sa panday ngadto sa maguwang.

"Maayo!" lagsik nga tubag sa maguwang. "Kita ka anang gikanal diha sa unahan? Wala unta na niadto apan ang akong silingan, ako man unta ni siyang manghod maoy nilungag niana sa nilabay'ng semana. Apan mahayan niya ang iyang gihimo kay patagmon ko siya! Na hala! Duol sa akong kamalig, atua didto ang pinundok nga troso. Buot ko nga imong kuralon kining akong panimalay sa taas nga koral aron ni bisan anino na lang sa akong igsuon dili ko hikit-an!" maisogong mando sa maguwang.

"Nasabtan ko Sir, ang buot nimong ipabuhat og ako gilayon kining himuon" matud pa sa panday.

Dayon milakaw ang maguwang. Gabas, dukdok, gabas, dukdok maoy gihimo sa panday. Tibuok adlaw siyang nagtrabaho og unya...Usa ka Tulay ang iyang namugna, tulay nga midugtong sa duroha ka managsuon.

Sa pag-abot na sa maguwang gikan sa lakaw iyang nakita ang iyang manghod nga malipayon kaayo nga nag-ingon: "Manoy, maayo kaayo ka nako kay bisan pa man sa akong gisulti og gibuhat, imo pa gyung gipatukod kining maong tulay," og nag-abot sila sa tunga-tunga. Pagkakita niini, gikabiba dayon sa panday ang iyang mga gamit aron molakaw apan gitawag siya sa maguwang: "Ayaw una! Aduna pa ko'y ipabuhat nimo!"

"Buot ko untang magpabilin," matud sa panday, "apan daghan pang mga tulay ang akong tukoron."

Pamalandong

Ang Dios dili mangutana kon unsang matanga sa sakyanan ang imong gimaneho kon dili pila ba ka tawo ang imong gipasakay niini.

Dili mangutana ang Dios kon unsa ka dak-a ang imong balay kondili pila man ang imong gipadayon sa imong panimalay.

Dili ka pangutan-on kon kinsa ang imong mga silingan, hinunoa, giunsa mo man pagtratar ang imong mga silingan.

Ang Dios dili mangutana kon nganong nalangay ka pagpangita sa imong Kaluwasan, kondili iya kang sapnayon nga mahigugmaon paingon sa imong balay didto sa langit og dili ngadto sa ganghaan sa Impiyerno...