Ang gasa

Sa kombento sa mga madre, dunay makaluluoy'ng hamtong nga nihangyo sa superyora nga pasudlon unta siya og trabaho aron sarang makapakaon sa iyang mga anak. Tinukmod sa dakong kaluoy, gipasulod ang maong hamtong ingon nga hardinero, panday, guwardiya, og mensahero sa maong kombento.

Apan sa gihapon, naguol ang mga madre sanglit nag-ilaid man sa tumang kalisud ang pamilya sa maong hamtong. Buot unta silang motabang kaniya, apan dili paigo ang ilang panudlanan. Paglabay sa pipila ka mga katuigan, ang maong tawo niumento og diyotay sa iyang panginabuhi uban sa iyang pagkamakugihon og sa panabang sa mga madre. Nakapondar siya og gamay nga barong-barong og natubag ang dakong panginahanglan sa iyang banay nga mao ang pagkaon.

Usa ka adlaw niana niadto ang hardinero sa opisina sa superyora nga mapahiyomon. Sa iyang kilid, iyang gisipitan ang usa ka buok manok. Human sa pangayog pangatahoran mapagarbuhon kaayo ang maong tawo nga mitanyag sa iyang dala: "Sister, niay manok, maayo na lang ni aron makahigop mo og init nga sabaw!"

Apan ang madre mitubag: "Hesus, maryosep!, wala na lang unta ka magdala-dala anang manok dinhi Iyo, yawat na lang nang masud-an sa imong mga anak nga wala pa gyud tingali makatilaw sa karne sa manok!"

Nauknol ang maong hamtong sa nadungog gikan sa madre. Miduko siya og dungan sa pag-agas sa lusok sa luha ang maong tawo nagkanayon: 'Sister, wala ba ko'y katungod nga mohatag kaninyog gasa tungod sa kaayo nga kanako, inyong gipakita?"

PAMALANDONG

Walay kabus nga walay ikahatag, og walay dato nga wala magkinahanglan.