Sa kompisalan

Sa dihang mikompisal ang sacristan sa Padre Kura, ang kura nangutana: "Hoy, tug-an na lang, ikaw ba ang nagkawat sa kolekta sa sibot?" sukna dala singhag sa pari. (Kay nagduda man gyud siya nga ang sakristan mao ang kawatan).

"Unsa to dre?"

"Ikaw ba ang nagkuha sa kolekta?"

Pasayloa ko dre, apan dili gyud ko kadungog" pamalibad sa sacristan.

Ning tungora naglagot na ang pari og misubli pagpangutana: "Tug-an ba, ikaw ba gyud ang nagkuha?"

"Pastilan dre, di gyud tawon madungog, mas maayo tingali nga mag-ilis ta dre og pwesto," sugyot sa sacristan og nag-ilis sila og pwesto.

Ning tungora ang sacristan na sab ang nangutana: "Pads, kuyog lagi mo ni Michelle atong secretary kagabii, diin mo gikan Pads?"

Ang pari kalma nga mitubag. "Husto ka dong, dili gyud diay tuod madungog?"

PAMALANDONG
Usahay, kusog kaayo kitang mangita og sayop sa uban, apan maglisud kita'g pagpaminaw, pag-angkon ug pagdawat sa atong kaugalingong mga sayop.