Nagpraktis

Gwapa, utokan, og byogol nga pagkababaye si Anne, nga sa ato pa, daghan gyud ang nangindahay nga makadama sa iyang gugma. Usa na niini si Marvin. Iyang silingan.

Hinuon, kon sa baraha pa, kini si Marvin dili matawag og Alas ni King, o kaha Jack. Kay sa tinuoray lang, daw Joker ra man gyud tawon ang iyang bayhon kon itandi sa kinatibuk-ang bayhon ni Anne.

Apan kay gugma man ang nagtukmod, mao nga nangarasti gayud kining si Marvin paghalad ngadto kang Anne sa iyang gugmang tim-os.

"Bitaw, Anne, I love you lagi," diga ni Marvin Joker.

"Sorry na lang no!" dayon paninghawak sa atong queen kay dili gyud ko ka take sa imong dagway nga lupig pay pakuratang agta sa dakit! Daw mora man ka'g iring gilaygit!"

Sinta ni Anne ngadto kang Marvin. Sa yano, hinay, og kalmadong tingog mingisi si Marvin dungan ang pag-ingon:

"Baya nimo Anne, paraktis lang gani tong ako, kay mamisita kong Sheryl unyang gabii." Dayon lakaw sa naamang nga babaye.

Pamalandong

Duha ka mga punto ang buot nakong ipaabot. Unya, adunay, uban nga daw nalumos sa gihuptan nilang lawasnong kaanyag og dili maantingong motan-aw sa kinatibuk-ang kaanyag nga nahuptan sa usa ka tawo ingon nga larawan sa Dios. Matud pa sa panultihon:"Ang habito dili makapahimo sa tawo nga monghe" kondili ang iyang binuhatan og pamatasan maoy motug-an kon kinsa og unsa siyang matanga sa pagkatawo.

Ikaduha, dili sayon dawaton ang kaparutan mao nga magpakaaron-ingnon na lang ang uban nga sila gihapon ang nagmadaugon bisan pa man kon sila pildero. Matud pa" "Ihilak ko na lang sa tago."

May mitug-an nako kagahapon nga dunay pipila ka opisyal sa Cebu Provincial Police Office nga nasuko nako tungod sa kanunay nakong pagsaway sa ilang kapalpakan sa paghimo og kampanya batok sa naghitak nga illegal nga sugal sa probinsya.

Ang ako lang ikasulti mao kini. Masuko diay mo kon hisgutan nga nagpabaya lang mo's inyong katungdanan? Unsa may inyong gusto nga akong ipublikar nga dalaygon kaayo ang kadagkoan sa CPPO kay walay gihimo sa illegal nga sugal sa probinsya? Ingon ana?

Ngilngiga god ninyo. Nganong ang kadagkoan sa kapolisan diri sa dakbayan sa Sugbo wala man lagi ko makadawat og report nga nasuko sila nako? Sa ato pa, gusto ko ninyong pahunongon sa paghisgot nga wala kamo mohimo'g kampanya sa illegal nga sugal?

Sultihan ko kamo, nasayod ko kon kinsa ang mga opisyal sa kapolisan nga nasuko kanako diha sa CPPO. Nasayod usab ko kon kinsa kadtong mga opisyal sa kapolisan diha sa CPPO nga wala makagusto ni Koronel Drusillo Bolodo apan wala lay mahimo.

Matandi man god na nila ang binuhatan sa mga commander. Si Bolodo matandi nila sa gipulihan niini nga si Koronel Vicente Loot nga bisan og ubos ra og ranggo ni Bolodo apan nagpakita og katakus.

Gani usa kini sa rason nga napiangan ang mga illegal nga kalihukan sama sa video karera diha sa probinsya. Ang mga hepe sa kapolisan nga nasakmitan og video karera ang ilang mga lugar human sa deadline nga gihatag ni Loot, gipang-imbistigar.

Subo lang hinoon nga palandungon nga human matangtang si Koronel Loot sa katungdanan, ingon sa gikatulgan na lang sab sa mga imbistigador ang pag-asikaso sa maong mga kaso.

Kanus-a man god nakahimo og hugtanay'ng kampanya kini si Koronel Bolodo sa mga illegal nga sugal sa probinsya? Duna siya'y enforcement arm nga direkta nga ubos sa iyang kamandoan.

Sa usa lang niya ka pagwitik sa tudlo, ang mga sakop sa provincial police intelligence section magdagan-dagan na sa paghimo og operation. Apan gihimo ba god kini ni Bolodo? Kon duna man siya'y written order, kutob ra sa papel, walay follow up.

Hangtud karon, naghitak gihapon ang mga illegal nga sugal sama sa video karera ug masyaw didto sa amihanang kalungsuran sa Sugbo. Dili kini malilong kanako tungod kay bisan wala na ko mag-ulian didto sa probinsya, masayod gihapon ko sa sitwasyon.

Sa giingon na nako, mas maayo pa ko og intelligence networks kay sa ubang mga polis. Wala malilong kanako nga mikatap ang mga video karera diha sa Bogo, Medellin, San Remigio, Tabogon. Sa ubang mga lungsod nagtoo sab ko nga duna, apan wa pa ko'y report.

Klaro kaayo nga ang mga polis niining mga dapita nagtanga lang sa ilang katungdanan, apan giisig-isig ba sila ni Bolodo sa pagpahimo og operation sa mga illegal nga sugal?

Gipatawag ba sila sa usa ka command conference og sama ni Loot gibauran nga manubag sila kon mapakyas sila pagsumpo sa mga illegal nga sugal? Mao kini ang mga rason nga dili ko mohunong sa pagsaway sa kapalpakan niining Bolodo pagdumala sa CPPO.

Unya masuko mo kong sawayon? Paghimo kamo og paspas nga operation batok sa illegal nga sugal, dili ba daygon ko kamo. May mihulga pa nga "Mabawsan ra namo na si Renbor." Bawos lang, ayoha lang pagtrabaho.