Parking fee momahal

Misuway ko og agi sa South Reclamation Project coastal road kagahapon aron personal nako nga masuta kon tinuod ba nga gihigpitan ang pagpasulod sa mga walay security pass, apan gipalahos ra man ko nga wala tan-awa kon duna ba ko'y passes.

Mga alas 11 sa buntag ko misulod diha sa SRP entrance duol sa Malacañang sa Sugbo, diin dunay usa ka babaye nga traffic enforcer nga nagbantay.

Basin og makaingon kamo nga nakaila sila kanako, wala. Wala man gani ko mag-open sa bentana sa akong "heavily tinted" nga sakyanan. Bitaw, wala ko'y buot ipasabot kaninyo, basta kay nakaagi ko sa SRP coastal road kagahapon.

Apan duna lang ko'y naobserbahan nga angay ning tagdon. Inig-abot diha sa taytayan sa Inayawan river man tingali na, gisirad-an ang pikas "lane." Sa ato pa, ang mga sakyanan nga gikan sa south ug mopaingon diri sa dakbayan, mapugos pagsubay sa "left lane."

Kon ang mga sakyanan nga mopaingon sa south kon dili makabantay ang drayber, sigurado nga magkabangga g'yod. Abi ninyo og ngano? Walay gibutang nga karatola sa maong lugar nga nagpahibalo sa mga motorista nga ang "lane" gigamit usab sa mga sakyanan nga gikan sa south.

Palihug Sir Paul Villarete, atong panagan-an ang umaabot nga aksidente. Kay kon mahitabo kini, kataw-an kita sa mga abogado nga mipasaka og kaso tungod sa pagsirado sa SRP road sa kinabag-ang katawhan.

* * *

Kagahapon sab, dunay nag-ayo sa karsada sa Inayawan nga mora'g walay utok. Nasayod sila nga tungod sa ilang gitrabaho dili na kaagian ang karsada kay nagtipun-og ang filling materials nga gibu-bo sa karsada ug nagbabag usab ang ilang heavy equipment, apan wala nila butangi og karatola sa may merkado sa Inayawan nga nagpahibalo niini.

Ang karatola nga didto gibutang sa dapit sa merkado igo lang nagpahibalo nga ang maong karsada, himoong "one way" gikan sa alas sayes ngadto sa alas utso sa buntag, ug sa alas singko ngadto sa alas utso sa gabii.

Tungod niini, misulod ko gikan sa Inayawan, apan pag-abot nako duol na sa eskena paingon ngadto sa Cogon-Pardo, dili diay kaagian ang karsada. Sunod gani ba, gamita ninyo ang inyong utok aron dili mahasol ang mga motorista. Tiaw mo, mibalik na sab ko ngadto sa Inayawan.

Dili kay ako ra ang motorista nga nagbagolbol kagahapon.

* * *

Pipila ka adlaw gikan karon, makurat na lang ang mga motorista kay mokalit lang og saka ang bayranan nila matag oras sa pagparking sa ilang sakyanan daplin sa karsada.

Gikan sa P10 - paumentohan kini ngadto na sa P15 ang oras. Gipirmahan na ni mayor Tomas Osmeña ang pag-amendar sa ordinansa nga naghimo og kausaban sa City Ordinance 1293, ang ordinansa nga nagtugot sa pagparking sa daplin sa karsada, apan bayad.

Ang akong baruganan niini mao nga grabe na kining pangwarta sa Citom. Akong ipasabot nga dili pangwarta sa indibidwal, kon dili para sa kinatibuk-ang Citom.

Ang ila untang buhaton aron modaku ang ilang kita, mao ang paghingusog sa pagpanakop sa mga masalaypong drivers, dili kay ang parking fee maoy pausbawan. Ang konseho, miuyon ra sab.