Black sheep

Dear Tito Miguel,

Maayong adlaw, ako  diay si Jeff, 27 anyos , taga Barangay Sapangdaku , Cebu City . Nangayo ko og tambag bahin sa akong girlfriend nga si Divine. Gihigugma gyud nako si Divine, ug sa among relasyon, nakita nako nga maayo siya nga tawo bisan pa og dili siya maayo og relasyon sa iyang pamilya. Giingnan ko sa iyang mga paryente nga si Divine kuno ang “black sheep” sa ilang pamilya. Daghan daw siyag nabuhat nga nakapalagot sa iyang pamilya .

Sa sinugdanan, wala kaayo nako kini tagda kay gusto nako nga ako mismo ang makaila kang Divine ug dili base sa istorya sa uban. Pero samtang nagkadugay mi, nakabantay pud ko nga usahay lisod siya sabton ug dali siya masuko. Aduna pud siyay mga desisyon nga usahay makapahunahuna nako kung sakto ba nga ipadayon pa nako among relasyon. Ang akong problema karon kay nahadlok ko nga basin sa umaabot, maapil ko sa mga problema niya sa iyang pamilya. Dili ko gusto nga biyaan siya tungod lang kay gitawag siya nga “black sheep,” pero dili pud ko gusto nga mawad-an ko sa akong kaugalingong kalinaw tungod sa among relasyon.

Tito Miguel , kinahanglan ba nako nga hatagan siya og higayon ug suportahan siya bisan lisod iyang relasyon sa pamilya? O kinahanglan ba nako nga magbutang og limitasyon aron maprotektahan pud nako ang akong kaugalingon? —Jeff

* * *

Jeff,

Ayaw kabalaka, uyab pa man mo. Paniid sa dili pa ka mahisugamak. Kun bati iyang  relasyon sa iyang pamilya, unsa kaha iyang gibuhat nga naka-ingon sila black sheep siya? Badlongon, sa eskuyla wala magtarong, duna’y bisyo, wala’y respeto o rebelde sa ginikanan?

Kinahanglan nimo susihon, pero dili pinaagi niya. Pangutana sa iyang pamilya mismo o mga higala ninyo nga nakasuheto. Sa maong paagi mahibaw-an o masabtan nimo’g ngano. Kun black sheep siya, red flag na daan, labi na gyud kun ang rason wala siya’y respeto sa ginikanan, kana angay gyud ka magduha duha. Pero duna’y mga black sheep sa pamilya apan tarong o nag-usab na sa ilang batasan .

Pero ka’y karon nakita na man nimo ang mga timailhan nga lagmit mao’y rason bati siya’g relasyon sa iyang pamilya, lagmit natural na niya, maski kinsa pa iyang  kuyog, pamilya, barkada o ikaw nga uyab niya. Ayaw kaguol nga maapil ka sa ilang  away sa pamilya. Ayaw lang gyud apil apil, wa ka’y labot nila.  Kun gihigugma gyud nimo siya, padayon lang aron makita nimo asa mo padulong. Kun ang batasan di na nimo makaon, sayon ra’g biya ilabi na wala pa mo naabot  sa kaminyoon.    —Tito Miguel

Magpatambag ka? Ipada kang Tito Miguel: 0991-318-9366