Dear Tito Miguel ,
Ako diay si Alex, taga Barangay Mabolo , Cebu City ug naa koy problema bahin sa akong uyab nga si Guada. Seryoso ko sa among relasyon, pero karon, pirmi siyang busy sa iyang trabaho. Kasagaran, lisod kaayo siya kab-oton ang libre niya nga oras para magkita mi.
Usahay, kinahanglan pa gyud nako siyang hangyoon daan ug mag-set og appointment aron lang kami maka-date . Masabtan nako nga importante ang iyang trabaho, pero usahay makahunahuna ko kung naa pa ba siyay panahon para sa among relasyon.
Dili ko gusto nga mahimong samok o makadugang sa iyang stress, pero gusto pud nako nga mabati nga importante gihapon ko sa iyang kinabuhi. Unsaon nako pag-balanse sa akong pagsabot sa iyang busy nga trabaho ug sa akong panginahanglan nga hatagan pud ko niya og panahon isip mag-uyab? Kinahanglan ba nako nga maghulat ug magpasensya, o kinahanglan na ba nako siyang istoryahan og seryoso bahin sa among relasyon?
Last month , kaduha rami nagkita . Dili man sad siya breadwinner .
Salamat daan sa imong tambag. — Alexander
* * *
Alexander,
Mora’g nagduda ka kun kamo pa ba. Duna ka’y basehan, ang tawo nga hingpit ang pagmahal kanimo mangita gyud na’g paagi nga magkita mo, maski unsa ka busy. Kun pananglit wala gyuy oras nga magkita mo, maski sa text o videocall iya buhaton sa dili pa mo mangatulog. Puwede sabton nga dili ni niya mabuhat tungod sa ka busy. Pero duna pu’y purohan nga iyang gigamit nga rason ang iyang trabaho aron modistansiya kanimo.Kun gusto ka makahibalo, kani ang buhata. Ayaw na istoryaha’g kumustaha unsa na’y estado sa inyo relasyon, paniid sa lihok, ayaw na paminaw sa pulong.
Text o tawag lang gihapon niya. Kun motubag, paniid kun duna ba’y hinangop o kun motubay ba o manamilit lang dayon. Suwayi’g videocall sa di pa mo mangatulog, kun motubag, paniid kun malipayon ba siya nga nakig-istorya kanimo o basin mo-ingon dayon giduka na siya. Ka’y kun sa text o tawag daw dili na siya interesado, buot pasabot dili ka busy ang hinungdan, posible nawala na ka sa iyang dughan.
Suwayi’g imbitar nga mag-date mo, kun mosugot, paniid kun malipayon ba siya nga nagkuyog mo, mangumusta ba nimo o interesado pa ba kanimo. Kun mobalibad, ingna nakasabot ka nga busy siya, busa mag-agad ra ka niya kun kanus-a mo magkita. Kun makigkita pa nimo, paniid lang gihapon basin napugos lang siya o girespetaran lang ka. Kun di na magparamdam, dugay na siya nibiya kanimo, nagpaabot lang nga ikaw na mismo ang makasabot. —Tito Miguel
Magpatambag ka? Ipada kang Tito Miguel: 0991-318-9366