Tinud-anay o gigamit lang?

Dear Tito Miguel ,

Maayong adlaw ,  ako diay si Giana , 23 anyos ug taga Barangay Labangon, Cebu City. Adunay lalaki nga nanguyab  kanako. Tawgon nato siya og Matthew. Buotan siya, matinahuron, ug klaro nga seryoso sa iyang tingoha kanako. Apan adunay usa ka butang nga nakahatag kanako og kabalaka. Bag-o pa lang siya nakigbulag sa iyang uyab. Bisan nagaingon siya nga naka-move on na siya ug andam na siyang magsugod pag-usab, usahay mabati nako nga naa pa gihapon siya’y kasakit nga gidala gikan sa iyang niaging relasyon.

Nahadlok ko nga basin mahimong “rebound” lang ko o gamiton lang niya aron makalimot sa iyang ex. Dili ko gusto nga mosulod sa usa ka relasyon nga dili pa hingpit ang iyang pag-move on . Sa laing bahin, dili usab ko gusto nga hukman siya base lang sa iyang nangagi kay posible man nga tinuod gyud ang iyang gibati para nako.

Unsa man ang akong angay buhaton? Hatagan ba nako siya og higayon aron mapamatud-an ang iyang intensyon?— Giana

* * *

Giana,

Hatagi lang og higayon, mao ra na’y paagi nga masusi nimo unsa gyud iyang intensyon. Kay kun imo siya balibaran tungod lamang sa imong kahadlok nga gamiton ra ka aron makalimot siya sa iyang ex, duna gihapon purohan nga sayop imong gikahadlokan. Sakto ka sa imong kahadlok ug pagduha -duha, apan dili buot pasabot ang imong gikahadlokan mao na’y sunod nga mahitabo. Unya’g sayop diay imong pagtuo, imong gipa-ikyas ang higayon nga makasulod ka’g tarong nga relasyon, buotan man kaha’g matinahuron.

Timan-i, ang tanang relasyon sugal, wala’y garantiya unsay sunod mahitabo. Total, dili man na red flag ang wala pa siya ka move on. Kun gusto ka makahibawo kun duna ba kay dili mauyonan niya, susiha unsa’y rason nga nagbuwag sila. Kay kun tungod nagbudhi siya, diha ka angay magduha duha, dili diay siya matagbaw sa usa.

Apan lagi, ang tanan wala’y garantiya. Kun nagbudhi siya sa sa iyang ex, basin sa imo matagbaw na. Ang relasyon haom haom. Aron ka makahibawo kun swak mo sa usa’g usa, hatagi lang siya’g higayon. Gani, hasta imong kaugalingon imo sad masukod. Wa baya ka naghisgot nga ganahan sad ka niya, mora lang ka’y nisulti nga pasado siya kanimo. Apan dili buot pasabot nagahanahan na ka’g mahigugma ba. Busa suwayi lang, tutal uyab pa man, mahimo ka moatras maski unsang orasa kun duna ka’y mamatikdan nga di masulbad nga problema. Kaysa sa mag sige ka’g pangutana unsa kaha kun nisuway lang ka. —Tito Miguel

Magpatambag ka? Ipada kang Tito Miguel: 0991-318-9366