OA ra nga relasyon?

Dear Tito Miguel,

Maayong adlaw , ako diay si Sharon , taga San Fernando, Cebu. Usa ka tuig kapin nami sa akong uyab nga si Ken.  Mairita ko sa ako uyab kay nasobraan ra sa pagsige og panawag, o ba kaha makig--video call bisan wala'y i importanteng topic. Sa tinoud lang,  kontento rako nga magkumustahay. Wala raman ko problema sa pag-video call, apan ang makasapot lang kay hasta magkaon ko, kinahanglan nga mag-video call bisan wala 'y angay nga istoryahan. Ganahan ra siya nga makakita nga nagkaon ko. Nakaingon ko, ka-OA sad aning relasyona uy.  Nakasabot ko nga gimingaw siya nako kay panagsa ra baya mi magkita tungod sa ka-busy namo sa work. Apan dili ko ganahan og OA nga relasyon , sige video call bisan wala na'y angayan istoryaan. Ako na siya gibadlong apan dili gyud siya mopatoo . Unsa akong buhaton ? - Sharon

* * *

Sharon,

Clingy siya, ikaw dili. Angay mo mag-abot sa tunga. Ayaw ihikaw kaniya ang higayon nga makakita kanimo maski sa video call lang. Panagsa ra mo magkita tungod sa ka-busy sa trabaho. Dili pa ka ana, usa na mo ka tuig, apan siya kanimo mingawon dayon. Nahigugma gyud ni siya kanimo. Pero basin sab seloso, manawag pirmi aron makasiguro. Maski na, kana ebidensiya gihapon nga ikaw pirmi niya gihandom.

Apan kinahanglan limitahan, ka’y wala na moy hinangpon kun masobrahan. Pagsabot mo’g oras nga mag -video call, kausa mata’g adlaw. Igo na ang 30 minutos o usa ka oras ini’g dayo’g katulog. Sa maong paagi, duna mo’y ikabalita sa usa’g usa unsa’y nahitabo sa inyong adlaw.

Lagmit magduda, basin duna ka’y laing kaistorya. Ingna nigawas ra gyud ang tinuod nga tuyo niya, dili ka’y maka-istorya ka, apan nagduda siya. Kun di mopatuo’g manawag gihapon, ayaw tubaga, kahibawo na siya ngano. Lagmit awayon ka, ingna ang relasyon dili kinahanglan magtutokay sa mga mata. Ang importante nagtan-aw mo sa pareho nga direksyon, sama sa kaminyoon.

Apan panid-i imong kaugalingon. Ngano di man ka ganahan kun gahinan ka niya’g taas nga oras? Basin dili pa nimo siya hinigugma? Kasagaran babaye, kiligon man gani, sa uyab mamugos pa’g oras. Basin secure lang gyud ka, dili sweet ug romantic. Apan kun magminyo mo, mas taas ang oras nga kuyog mo, hangtod sa pagkatulog. Kun wala nimo makita imong kaugalingon sa maong sitwasyon, dili siya ang imong gusto kuyogon sa kaminyoon. -- Tito Miguel

Magpatambag ka? Ipada kang Tito Miguel: 0991-318-9366